Umutwe w'ingabo wihariye urinda Papa uzwi nka "Garde Suisse" watangije ibikorwa bizawufasha kubona abasirikare bashya

Nk'uko byatangajwe mu itangazo ryo kuri uyu wa 1 Nzeri 2022, Ingabo zirinda Papa zashyizeho ibi bikorwa bibiri mu rwego rwo kurushaho gukorana n'igihugu cy'u Busuwisi zikomokamo.

Bagize bati«Kubera ubwiyongere bw'ingabo zirinda Papa zavuye ku 110 zikagera ku 135, umubare w'ingabo zikenerwa buri mwaka ukomeje kwiyongera. Kubera iyo mpamvu twabonye ari ngombwa ko dushyiraho inzego zatuma turushaho kumenyekana".

Muri ibi bikorwa byatangijwe harimo urwego ruzahuza izi ngabo za Papa n'itangazamakuru ryo mu Busuwisi rukazafasha kumenyekanisha ibikorwa by'ingabo za Papa n'ibindi bikorwa bifite aho bihuriye n'izi ngabo; mu gihe urwego rw'ubuyobozi ruzafasha guhagararira izi ngabo mu zindi nzego z'ubuyobozi mu gihugu cy'u Busuwisi.

Stefan Wyer, w'imyaka 57 ni we washinzwe ibirebana n'itumanaho. Azaba yungirijwe na Christoph Graf, uzaba ashinzwe gushaka abasore bo kwinjira muri izi ngabo na Bernhard Messmer.

Umutwe w'ingabo zirinda Papa n'urugo rwe watangiye mu 1506 ukaba ari umutwe kugera ubu ugizwe n'ingabo zikomoka mu gihugu cy'u Busuwisi.