Umwepiskopi wa Matagalpa muri Nikaragwa yagotewe mu nzu n'inzego z'umutekano abuzwa kujya guhimbaza Misa

Uyu mwepiskopi wagaragaye mu ifoto ari imbere y'Abapolisi bashinzwe guhosha imidugararo, Leta ya Nikaragwa imushinja ko inyigisho ze ngo zaba zikurura umwuka mubi n'imyigaragambyo mu baturage. Polisi y'iki gihugu ivuga ko ngo uyu mwepiskopi yaba agira uruhare mu gutiza umurindi udutsiko tw'abagizi ba nabi ndetse ko ngo yaba ashishikariza abaturage kurwanya guverinoma y'iki gihugu iyobowe na Perezida Daniel Ortega.

Mgr Rolando José Álvarez Lagos ntiyahwemye kunenga ihohoterwa ry'uburenganzira bwa muntu n'igitugu mu butegetsi bwa Perezida Daniel Ortega.

Tariki 4 Kanama 2002, ubwo yari agiye gusohoka ngo ajye mu Misa, Mgr Rolando Álvarez yasanze urugo rwe rugoswe n'abapolisi banafunze irembo ryinjira mu rugo. Myr Ronaldo yamenyesheje abakristu ko ari kumwe n'abapadiri batandatu n'abalayiki batandatu bose bari bafungiwe hamwe na we mu rugo. Yababwiye kandi ko biteguye kuhaguma kandi ko batari bwubahuke inzego z'umutekano.

Myr Alvarez ni umwe mu bayobozi bakomeye ba Kiliziya Gatolika mu gihugu cya Nikaragwa. Kiliziya muri iki gihugu ikaba ishinzwa n'ubutegetsi kugira uruhare mu myivumbagatanyo y'abaturage yatangiye mu 2018. Ibi byatumye Leta y'iki gihugu ikomeza gutoteza Kiliziya Gatolika mu buryo butandukanye. Kimwe mu bikorwa biheruka harimo ifungwa rya radio zirindwi za Kiliziya Gatolika ryabaye tariki 1 Kanama 2022.

Umunyamategeko Martha Patricia Molina, avuga ko Kiliziya Gatolika muri Nikaragwa imaze gukorerwa ibikorwa by'urugomo bigera kuri 250 birimo guhumanya za Kiliziya, ibitero byitwaje intwaro, gutwika no gusahura.

Inama y'Abepiskopi muri iki gihugu yagaragarije Myr Ronaldo ko imuri hafi mu itangazo ryasomewe abakristu kuwa 7 Kanama 2022, igira iti«Tubabajwe cyane n'iki gikorwa, nk'abepiskopi n'umuryango w'abakristu muri Nikaragwa, iyo umwe muri twe ababaye natwe tubabarana na we».