Urubyiruko rwa Paruwasi ya Kivumu rwishimiye kwakira umusaraba wa forumu

Mu byishimo byinshi urubyiruko rwa Santarali ya Munyinya ya paruwasi ya Gitarama ari nayo yari ifite uyu musaraba rwifatanyije na padiri omoniye w'urubyiruko muri diosezi ya kabgayi, gutambagiza uyu musaraba berekeza muri paruwasi ya Kivumu mu ndirimbo zishyushye zirata ubutsinzi bwa Kristu waducunguje umusaraba we.

Mu nzira hari aho bageraga bagahagarara maze bakumva inyigisho ngufi ku musaraba ikimenyetso cy'umutsindo wa Kristu n'abamwemera. Bageze kuri paruwasi ya Kivumu urubyiruko rwataramiye umusaraba runawuramya hakurikiraho Igitambo cya Misa.

Mu ijambo yagejeje ku bakristu ba paruwasi ya Kivumu biganjemo urubyiruko, Padiri Niyonshuti Jean Damascene, Omoniye w'urubyiruko muri diyosezi ya Kabgayi, yasabye urubyiruko kutagira ipfunwe ryo kwamamaza Kristu.

Yagize ati "Rubyiruko turi intumwa za Kristu. Nimuze rero twamamaze Kristu, turamye umusaraba kuko Kristu ari we mutsindo wacu."

Padiri Jean Damascene yasabye urubyiruko kwitabira kuramya no gutambagiza umusaraba w'amizero kuko benshi bagiye bawakira bagasenga babikuye ku mutima bagiye baronka ingabire zinyuranye zirimo ibyishimo, amahoro mu miryango, amahoro y'umutima , gukira indwara n'ibindi.

Yakomeje abwira urubyiruko ko uyu musaraba ari isoko y'ibyishimo kuwutambagiza bikaba ari uburyo bwo gusakaza ibyishimo mu rubyiruko kuko Kiliziya ikeneye urubyiruko rwishimye.

Padiri mukuru wa paruwasi ya Kivumu Mathias Kule mu Ijambo rye yabwiye urubyiruko ko ibishuko byose bazabitsinda nibarangamira umusaraba wa Kristu.

Yagize ati "Dore ibanga ry'agakiza, ibanga ryo gutsinda ibigeragezo n'ibishuko byugarije urubyiruko rwa none, nimuze muramye umusara mubwire Yezu ibibashuka byose kuko umusaraba ari umukiro w'abemera".

Mu buhamya bwatanzwe n'urubyiruko rwa Paruwasi ya Gitarama aho uyu musaraba wari umaze iminsi, bavuze ko umusaraba wabunguye byinshi.

Tuyizere Regis, umwe mu rubyiruko rwo muri paruwasi ya Gitarama, yagize ati "Abajene ntabwo dukunda kugaragara mu gushengerera, ariko mu gihe twari dufite uyu musara twabonye umwanya wo kwegera Nyagasani mu gushengerera tubwira Yezu ibyacu byose. Turashishikariza urubyiruko rwa paruwasi ya Kivumu kwitagatifuza bakoresheje uyu musaraba wa Kristu.”

Umuyobozi w'urubyiruko muri Paruwasi ya Kivumu Nyandwi Emmanuel yagaragaje ibyishimo we na bagenzi be batewe no kwakira uyu musaraba w'urubyiruko. Yagize ati "Dufite ibyisho byinshi kuko twakiriye umusaraba w'urubyiruko, twari tumaze iminsi twitegura kandi tunyotewe no kuwakira. Ni kenshi tugira intege nke nk'urubyiruko mu buzima bwacu busanzwe, ugasanga imbaraga ni nkeya mu bikorwa bimwe na bimwe byo gusenga. Turahamya ko uyu musaraba twakiriye ugiye kutubyutsa no kutwongerera imbaraga n'ikizere mu kwemera".

Umusaraba wa forum y'urubyiruko watanzwe na papa Yohani Pawulo wa II mu 1982, umusaraba wa Kristu amizero yurubyiruko ukaba umaze gutambagizwa muri paruwasi 22 muri 29 zigize diyoseze ya kabgayi, hakaba hasigaye paruwasi 7 zitegereje kwakira uyu musaraba mbere y'uko ugezwa muri arikidiyosezi ya Kigali ku itariki 25 Nyakanga 2023 ari naho hazabera forumu yurubyiruko ku rwego rw'igihugu izatangira ku itariki ya 23 kugeza kuya 27 Kanama 2023.