Abagororwa bitegura kurangiza ibihano barasabwa gushira impumu kuko Abanyarwanda biteguye kubakira

Ibi yabigarutseho kuri uyu wa gatatu tariki 31 Mutarama 2024, ubwo Komisiyo y'ubutabera n'amahoro  na Caritas ya Diyosezi ya Cyangugu ku bufatanye n'abakristu ba paruwasi ya Nkombo na Nkanka bari mu gikorwa cyo gusura abagororwa mu Igororero rya Rusizi. Muri gahunda yo kubagaragariza  ko umuryango mugari utabibagiwe.

Agaruka ku bagororwa bari kwitegura gutaha mu gihe bazaba barangije ibihano bakatiwe ku byaha bya jenoside yakorewe Abatutsi,padiri Irakoze Hycenter, yababwiye ko badakwiye kugira impungenge n'ingingimira z'aho bitegura gutaha kuko abakristu mu maparuwasi yose ndetse n'abaturage mu mirenge yose bamaze kwitegura kubakira nk'abavandimwe babo.

Yagize ati" kimwe mu bikorwa byo guharanira ubudaheranwa turi gukora nka Komisiyo y'ubutabera n'amahoro, ni ugufasha abagororwa bamaze gusoza igihe cyabo cyo kugororerwa aha ngaha, kuza mu muryango mugari bisanga, bakaza batikandagira, bakaza batikanga, ntibaze batekereza ngo buriya abo ku musozi w'iwacu bambona mu ishusho yo mu 1994, iyo bambonye bambona kwakundi nari meze icyo gihe. Oya, ni ugufasha abari kurangiza igihe cyabo cyo kugororwa aha ngaha kuza biyumva nk"abantu baje gufatanya n'abandi kubaka umuryango mugari, kubaka ubuvandimwe."

Padiri Irakoze kandi yanagarutse kubarangiza ibihano byabo,  aho gutaha basanga imiryango yabo aho bavuka, kubera ipfunwe  bagataha bajya mu bindi bice  by'igihugu aho batabazi. Yabahumurije ababwira ko inzego za kiliziya zifatanyije na leta ko  aho bahuriye n'abakristu ari nabo baturage icyo babashishikariza ari ukuzakira neza abazaba baje babasanga bavuye mu magororero barangije ibihano byabo.

Yakomeje agira ati" abari ahangaha, baba abazasoza ejo, ejobundi cyangwa se mu mpera z'uyu mwaka, mwumve yuko bavandimwe Abanyarwanda, abakristu biyeguye kubakira neza. Mwoye kugira ubwoba, mwoye kugira ingingimira. Hari abarangiza hano igihe cyo kugororwa, bagasohoka ahangaha aho kugira ngo bajye ku Nkombo, ku Nkanka aho bavuka ahubwo bagafata bagenda izindi ntara aho batabazi, ibyo ntago aribyo kuko baba bari gusenya imiryango yabo kandi nyamara iyo miryango yabo yarabafashije igihe cyose babaye aha ngaha mu Igororero, barabagemuriye, barababaye hafi mu bushobozi buke cyangwa bwinshi bari bafite ariko kubera ipfunwe akavuga ati ngewe ndagiye wasanga bakimbona nka wawundi, oya ibyo ntago ari byo. Abapadiri bakuru ndetse n'abayobozi mu nzego za leta ab'imirenge n'utugari, ahantu hose bahuriye n'abakristu n"abaturage, icyo babashishikariza ni ukwitegura kubakira neza".

Ikifuzo cy'umwepiscopi wa diyosezi gatolika ya Cyangugu, ni uko muri uyu mwaka w'ubutumwa wa 2023-2024, binyuze muri Caritas ya Diyosezi, yasabye abakristu bo mu maparuwasi yose ko bajya bagira icyo bigomwa hanyuma bakaza gusura abagororwa bakitwaje nk'ingemu. Iyi gahunda rero ikaba yaratangiriye muri paruwasi ya Nkombo na Nkanka aho abakristu b'izi paruwasi zombi kuva mu ntangiriro za Mutarama batangiye kugira ibyo bakusanya, bakaba basuye abagororwa mu Igororero rya Rusizi babashyiriye ingemu yakusanyijwe igizwe n'imyambaro, ibikoresho by'isuku ndetse n"inyunganiramirire, bibarirwa agaciro ka milioni zikabakaba ebyiri n'ibihumbi magana tatu (2,300,000)