Abana bagera ku bihumbi 19 bo muri Gaza bamaze gupfira mu bitero bya Israel na Hamas.

Ishami rya Loni rishinzwe kwita ku mpunzi muri Palestine, (UNRWA United Nations Relief and Works Agency) riherutse gutangaza ko nta hantu na hamwe hahungishirizwa abana harindiwe umutekano, hari ku wa ku wa 19 Nyakanga 2025.

Batangaje ko kubera ibitero simusiga Israel imaze hafi imyaka ibiri igaba ku mutwe wa Hamas ibigo by’amashuri agenzurwa na Loni ubu ari yo yashyizwemo abaturage batakigira aho kuba.

Loni ivuga ko n’aho hantu yacumbikiye abaturage na ho ibitero bya Israel byahageze bigahitana ubuzima bwa benshi harimo n’abana.

Mu itangazo ishami rya Loni rishinzwe kwita ku mpunzi (UNRWA United Nations Relief and Works Agency) ryashyize ahagaragara ivuga ko nta hantu na hamwe muri Gaza hatekanye hahungishirizwa abana, hakenewe agahenge byihutirwa.

Ishami ry’umuryango w’abibumbye ryita ku bana UNICEF r igaragaza ko mu mezi atanu ashize nyuma y’aho Israel yongeye kugaba ibitero, abana bagera kuri 540 bicwa buri kwezi ni nyuma y’uko agahenge kari kashyizweho kari karangiye.

Abarenga ibihumbi 62 bamaze kwicirwa muri Gaza naho abarenga ibihumbi 150 ni bo bamaze kubikomerekeramo.

Intambara hagati y’ umutwe wa Hamas na Israel yatangiye muri 2023. Uyu mutwe wari wagabye ibitero kuri Israel bihitana abagera ku 1200 abandi barenga 250 barashimutwa.

Umushumba wa Kiliziya Gatolika ku isi, Nyirubutungane Papa Leo XIV ntahwema gusaba ko ibihugu birimo intambara yahagarara. Asaba ko habaho agahenge k’intambara muri Gaza no muri Ukraine, agasaba impande zombi kwinjira mu biganiro bigamije amahoro arambye, abantu bakimakaza amahoro n’ubutabera.

Kuri uyu wa gatanu akaba yatangaje ko ari umunsi w’igisibo kugira ngo abantu basenge basabira amahoro ibihugu birimo intambara ndetse banasabira abakomeje kugerwaho n’ingaruka z’Intambara. Papa agaragaza impungenge ku buzima bw’abasivile bari mu kaga cyane cyane abana n’abagore bari mu bice birimo intambara