Abapadiri ba diyosezi ya Nyundo bakinnye imikino ya gicuti n'aba diyosezi ya Ruhengeri

Iyi mikino yatangiye mu masaha ya saa sita aho bahereye ku mikino y’amaboko yabereye mu Nzu mberabyombi ya Centre Culturel Vision Jeunesse Nouvelle ikomereza ku mupira w’amaguru wabereye muri Stade Umuganda.

Mu mupira w’intoki wa Volleball wabimburiye iyindi, diyosezi ya Nyundo yatsinze iya Ruhengeri ku maseti atatu ku busa (3-0).

Mu duce dutatu twakinwe, ikipe y’abapadiri ba diyosezi ya Nyundo barushije mu buryo bugaragara abapadiri ba diyosezi ya Ruhengeri kuko agace ka mbere Nyundo yagatsinze ku manota 25 kuri 22 ya Ruhengeri. Agace kakurikiyeho Nyundo yagatsinze ku manota 25-13 ndetse n’agace gasoza Nyundo igatsinda ku manota 25-16.

Iyi mikino ya gicuti yasorejwe ku mukino w’umupira w’amaguru wabereye muri stade Umuganda aho wasojwe amakipe yombi anganya ubusa ku busa.

Iyi mikino yakomereje ku mukino wa Basketball nawo watsinzwe na Diyoseze ya Nyundo ku manota 20 kuri 16 ya Ruhengeri.

Ni umukino byagaragaraga ko impande zombi zawiteguye neza kuko nta kipe yaruhije indi mu buryo bugaragara.

Iyi mikino yitabiriwe na Myr Anaclet Mwumvaneza wa Diyosezi ya Nyundo na Myr Visenti Harolimana wa Diyosezi ya Ruhengeri bakaba ari na bo bagiye batangiza imikino yose. Hari Kandi n'abandi bashyitsi barimo Janvier Ramuli, Mayor wa Musanze ndetse na Mayor wa Rubavu witabiriwe umupira w'amaguru.