Abepiskopi Gatolika bo muri Tanzaniya bihanganishije imiryango yaburiye abayo mu mpanuka y’indege yabereye mu kiyaga cya Victoria
Kuri uyu wa mbere, Tariki 7 Ugushyingo Abepiskopi Gatolika bo mu gihugu cya Tanzaniya batanze ubutumwa bwihanganisha imiryango yaburiye abayo mu mpanuka y’indege yabaye ku cyumweru tariki 6 Ugushyingo 2022, mu kiyaga cya Victoria.
Mu butumwa aba bepiskopi bageneye iyi miryango, bagize bati “Inama y’Abepiskopi Gatolika muri Tanzaniya yifatanyije mu kababaro n’imiryango y’ababuriye ababo ndetse n’abakomerekeye mu mpanuka y’indege yabereye i Bukoba, mu karere ka Kagera . Inama y’Abepiskopi muri Tanzaniya (TEC) yifurije abo muri iyi miryango kwihangana no gukomera muri ibi bihe bitoroshye. Imana ihe iruhuko ridashira abapfuye,urumuri rwayo rubamurikire iteka baruhukire mu mahoro.”
Nk'uko Aciafrica.org ibitangaza, iyi mpanuka y'indege y’Ikigo gitwara abagenzi cyo muri Tanzania ’Precision Air’yabaye ku Cyumweru tariki 6 Ugushyingo 2022 ahagana saa mbili n’igice za mu gitondo yakozwe n’ indege ifite ibirango bya PW 494 -5H-PWF yavaga i Dar es Salaam yerekeza mu mujyi wa Bukoba ; yakoze impanuka maze igwa mu kiyaga cya Victoria ubwo yiteguraga kugwa ku kibuga cy’indege cya Bukoba ihitana abantu 19 muri 43 bari bayirimo.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
