Vatikani yatangaje uzahagararira Papa Fransisiko mu Ikoraniro ry’Ukaristiya muri Amerika

Mu gihe ubuyobozi bwa Kiliziya Gatolika mu gihugu cya Leta Zunze Ubumwe za Amerika bukomeje imyiteguro yo guhimbaza ikoraniro ry’ukaristiya muri nyakanga uyumwaka, Nyirubutungane Papa Fransisiko yahisemo Karidinali Louis Antonio Tagle ukomoka mu Gihugu cya Philippine ngo abe ari we uzamuhagarira muri iri Koraniro riteganyijwe kuva 17-21 Nyakanga 2024.

Mu itangazo ryashyizwe ahagaragara n’Inama y’Abepiskopi Gatolika bo muri iki gihugu USCCB (The United States Conference of Catholic Bishops) kuwa 18 Gicurasi 2024, umuyobozi w’iyi Nama Arkiyepiskopi Timothy Boglio yavuze ko ari impano bahawe yo guhimbaza iri koraniro bari kumwe na Karidinali Tagle.

Arkiyepiskopi Timothy Boglio avuga ko Kiliziya Gatolika muri iki gihugu yishimiye kuzahimbaza iri koraniro bari kumwe na Kardinali Tagle ngo kuko atari ubwa mbere azaba ageze muri iki gihugu; dore ko yahabaye igihe kirekire, kuko ari naho yasoreje amasomo ya Kaminuza mu cyiciro cya Doctorat muri Tewolojiya “Doctorat of Theology” mu mwaka w’1991.

Karidinali Louis Antonio Tagle, wahoze ari Arkiyepiskopi wa Manila muri Philippine yatorewe imirimo ya gitumwa mu buyobozi bukuru bwa Kiliziya Gatolika (theVatican Curia) i Roma kuva mu 2019. Nyuma y’imirimo inyuranye yakoze mu bihe bitandukanye hirya no hino ku isi, ubu akora muri biro bya Kiliziya bishinzwe Iyogezabutumwa (Decastery for Evangelisation).

Umuhango wo guhimbaza Ikoraniro ry’Ukaristiya muri Leta Zunze Ubumwe z’Amerika uzatangirizwa muri Sitade ya “Lucas Oil Stadium”muri Indianapolis kuva kuwa 17 Nyakanga, Karidinali Tagle akaba ari we uzayobora Igitambo cya Misa gisoza iri koraniro kuwa 21 Nyakanga 2024.