Amashuri atanu y’abakobwa agiye gutangirizwamo gahunda yo guteza imbere Basketball mu Rwanda

Aya mashuri ni yo azatangirirwamo gahunda yiswe Basketball for Girls in Schools Programme, izashyirwa mu bikorwa kuva muri uyu mwaka wa 2026 kugeza mu 2030, hagamijwe guha abakobwa amahirwe ahoraho yo gukina Basketball, kubona imyitozo iboneye no guteza imbere impano zabo.

Amasezerano y’ubufatanye yashyizweho umukono ku wa Gatatu, tariki ya 28 Ukwakira 2026, mu muhango wabereye muri BK Arena i Kigali.

Iyi gahunda ntigamije guteza imbere impano z’abakobwa muri Basketball gusa, ahubwo inagamije kubafasha kunguka ubumenyi n’indangagaciro bizabagirira akamaro mu buzima bwa buri munsi.

Amashuri yatoranyijwe ni Lycée Notre Dame de Cîteaux yo mu Karere ka Nyarugenge, Maranyundo Girls School yo mu Bugesera, École Secondaire Saint Vincent Muhoza yo mu Karere ka Musanze, GS Mère du Verbe–Kibeho yo mu Karere ka Nyaruguru na Institut Sainte Famille yo mu Karere ka Nyamasheke.

Yatoranyijwe nyuma y’isuzuma ryakozwe na FERWABA na Sport4Change Foundation, harebwa ubushobozi bwayo bwo gushyira mu bikorwa iyi gahunda, ibikorwaremezo bya siporo ifite n’uburyo ishobora korohereza abakobwa kwitabira no gukomeza gukina Basketball.

Aya masezerano akurikiye itangizwa ry’iyi gahunda muri Mutarama 2026, ubwo impande zombi zatangiraga gushyiraho uburyo bwo guteza imbere Basketball y’abakobwa bahereye mu mashuri, hagamijwe kubaka urufatiro rukomeye rw’uyu mukino mu Rwanda.

Mu cyiciro cya mbere, buri shuri rizashobora kwandikisha abakobwa bagera kuri 20. Ibi bivuze ko amashuri yose uko ari atanu azahuriza hamwe abakobwa bagera ku 100 bazahabwa imyitozo n’ubundi bufasha buzabafasha gutera imbere muri Basketball.

Abazitabira iyi gahunda bazahabwa imyitozo ya Basketball iteguye neza, ibafashe kongera ubumenyi mu mukino no guteza imbere impano zabo.

Bazahabwa kandi amahugurwa agamije kubafasha kwigirira icyizere, gukorera hamwe, kugira ubushobozi bwo kuyobora abandi no gufata ibyemezo biboneye.

Iyi gahunda izibanda no ku guteza imbere ubuzima bwiza, guharanira amahirwe angana no guhuza abakobwa n’abantu bafite ubunararibonye muri siporo, bashobora kubagira inama no kubafasha mu rugendo rwabo rwo kwiteza imbere.

Abakobwa bazagaragaza impano zidasanzwe bazabona amahirwe yo gukomeza kuzamura urwego rwabo, binyuze mu makipe ya Basketball no mu marushanwa atandukanye agamije guteza imbere abakinnyi.

Mu masezerano yashyizweho umukono, buri shuri rizafatanya na FERWABA na Sport4Change Foundation mu gutegura imyitozo, korohereza abakobwa kwitabira ibikorwa bya siporo no gutanga ibikorwaremezo bikenewe kugira ngo iyi gahunda ishyirwe mu bikorwa neza.

Umwe mu bafatanyabikorwa bazagira uruhare mu ishyirwa mu bikorwa ry’iyi gahunda ni FIBA Foundation, umuryango ushamikiye ku Ishyirahamwe Mpuzamahanga ry’Umukino wa Basketball (FIBA).

Binyuze muri gahunda yayo ya Basketball For Good, FIBA Foundation yiyemeje gutanga ibikoresho n’inkunga y’amafaranga bizifashishwa mu bikorwa byo guteza imbere Basketball mu bakobwa.

Muri iyo nkunga harimo imipira 80 ya Basketball yo mu bwoko bwa Molten, imyambaro ya siporo yo mu bwoko bwa PEAK n’amafaranga azakoreshwa mu bikorwa bitandukanye by’iyi gahunda.

Buri shuri muri atanu yatoranyijwe ryagenewe imipira 16, kugira ngo abakobwa bazitabira imyitozo babone ibikoresho bihagije byo kwifashisha mu myitozo no mu bindi bikorwa bya Basketball.

Uretse ibikoresho n’inkunga y’amafaranga, FIBA Foundation izatanga n’ubujyanama n’ubufasha mu ishyirwa mu bikorwa ry’iyi gahunda, cyane cyane mu gihe cy’amezi kuva muri Kanama kugeza mu Kuboza 2026.

Ubu bufatanye bugamije gukemura zimwe mu mbogamizi zituma abakobwa batitabira Basketball uko bikwiye, zirimo kubura ibikoresho, kutabona imyitozo ihoraho no kubura amahirwe yo gukomeza guteza imbere impano zabo.

Intego ni ukugera ku mashuri 30 mu 2030

Biteganyijwe ko iki cyiciro cya mbere kizafasha FERWABA na Sport4Change Foundation gusuzuma uko gahunda ikora, kumenya imbogamizi zihari no kureba umusaruro w’ibikorwa byayo, kugira ngo hategurwe uko izagurwa ikagera no ku yandi mashuri.

Intego ni uko mu gihe iyi gahunda izaba imaze gushyirwa mu bikorwa, kuva mu 2026 kugeza mu 2030, izaba imaze kugera ku mashuri agera kuri 30 yigamo abakobwa gusa.

Ibi bizafasha kwagura amahirwe abakobwa bafite yo gukina Basketball, guteza imbere impano zabo no kongera umubare w’abakobwa bitabira uyu mukino mu Rwanda.

Sport4Change Foundation yashishikarije ibigo bya Leta n’iby’abikorera, imiryango itandukanye n’abandi bafatanyabikorwa mu iterambere kugira uruhare muri iyi gahunda.