Caritas Rwanda yageze ku ntego zayo hejuru 90% muri 2023

Ibi yabitangaje kuri uyu wa Mbere, tariki ya 11 Werurwe 2024 mu nama y’Inteko rusange ya Caritas Rwanda iri kubera i Kigali kuva tariki ya 11 kugeza 12 Werurwe 2024.

Mu kiganiro na Kinyamateka, Padiri Kagimbura yavuze ko iyi nama igamije gusuzumira hamwe ibikorwa byakozwe muri 2023 ndetse no guteganya ibizakorwa muri 2024.

Nk’uko akomeza abivuga, ibikorwa bisuzumwa ni ibikorwa bikorerwa muri komisiyo enye za Caritas arizo; Komisiyo ishinzwe ibijyanye n’umutungo no gucunga abakozi, ishinzwe ibikorwa byo kwita ku batishoboye, ishinzwe ubuzima, n’ishinzwe iterambere ry’abafashwa na Caritas.

Muri uko gusuzuma ibyakozwe, Padiri Kagimbura yemeza ko ibyari biteganyijwe muri 2023 byagezweho ku kigero kiri hejuru ya 90%.

Yagize ati “Ibyo bikorwa rero turi kubisuzuma, mu kuri turabona uko twabikoze umwaka ushize birashimishije, turi ku rwego navuga ko ruri hejuru ya 90%, ku buryo twishimira ko byagenze neza.”

Agaruka ku mikoranire hagati ya Caritas Rwanda na Caritas muri za diyosezi, Padiri Kagimbura yavuze ko gukorera hamwe ari yo mpamvu nyamukuru yo kuba ibikorwa byabo byaragezweho ku gipimo gishimishije.

Ati “Imikoranire hagati ya Caritas Rwanda na Caritas za Diyosezi, ni imikoranire iganisha ku kugendera hamwe. Nk’uko Sinodi ibidusaba, ubu dufite icyerekezo kimwe n’intego zimwe muri ubwo butumwa bumwe dusangiye bwo gufasha.”

Iyi nama yafunguwe ku mugaragaro na Musenyeri Anaclet Mwumvaneza, Umwepiskopi wa Nyundo ari nawe Perezida wa Caritas Rwanda, yitabiriwe kandi n’Intumwa ya Papa mu Rwanda, Myr Arnaldo Sanchez Catalan, Abepiskopi Antoni Kardinali Kambanda wa Arkidiyosezi ya Kigali, Myr Balthazar Ntivuguruzwa wa Kabgayi, Myr Filipo Rukamba wa Butare, Myr Célestin Hakizimana wa Gikongoro, Myr Papias Musengamana wa Byumb ana Myr Jean Marie Vianney Twagirayezu wa Kibungo.