Caritas Rwanda yashimiye Therese umaze imyaka isaga 18 ayikorera

Ikimenyetso cy'ishimwe kiriho umukono wa Myr Anaclet Mwumvaneza, yagishyikirijwe na Padiri Oscar Kagimbura, Umunyamabanga mukuru wa Caritas Rwanda. Mu butumwa yamugejejeho yamushimiye ko yujuje Inshingano ze igihe yamaze muri Caritas akaba yaratanze umusanzu we wose yasabwaga.

Therese yahawe iri shimwe imbere ya bagenzi be basaga 100,bakorera Caritas Rwanda mu mishinga itandukanye, bari bateraniye kuri Cercle Sportif Rugunga, ngo bizihirize hamwe umunsi w'umurimo.

Ni igikorwa cyabanjirijwe n'imikino y'umupira w'amaguru na Volleyball yahuje ikipe y'abakora mu mushinga wa Igire-Gimbuka n'abandi bakora mu yindi mishinga.

Iyi mikino yarangiye mu mupira w'Amaguru ikipe y'Abakora muri Igire-Gimbuka itsinze ibitego 2 kuri 1, mu gihe muri Volleyball byarangiye Abakora mu yindi mishinga batsinze Amaseti 2 kuri 1.

Padiri Kayisabe Vedaste, Umunyamabanga Mukuru w'Inama y'Abepiskopi Gatolika mu Rwanda, witabiriye ibi birori, yashimiye ubuyobozi bwa Caritas Rwanda bwateguye iki gikorwa, abasaba gukomeza kurangiza neza inshingano bahawe na Kiliziya.

Umunyamabanga mukuru wa Caritas Rwanda Padiri Oscar Kagimbura yashimiye buri mukozi wese witabiriye uyu munsi bashyiriweho ngo bizihize umunsi w'umurimo usanzwe uba ku itariki 1 Gicurasi abasaba gukomeza kwitangira umurimo bakora kuko ari ingenzi mu gufasha Caritas gutabara abakene ishinzwe.