Seminari ya Karubanda yasobanuye impamvu yashyizeho irushanwa ryihariye ryo kwibuka Rutsindura

Nk'uko byagaragajwe na Padiri Jean de Dieu Habanabashaka, Umuyobozi wa Petit Seminaire Virgo Fidelis, Rutsindura Alphonse yakoze ibikorwa byinshi byateje imbere iyi Seminari ndetse biteza imbere n'igihugu. Iyi akaba ari na yo mpamvu Seminari yateguye irushanwa ryo kumwibuka yise "Memorial Rutsindura" mu rwego rwo kumuha icyubahiro.

Ati:”Ni igikorwa kimaze kumenyerwa, buri mwaka twibuka Rutsindura nk'umuntu wakoze ibikorwa byiza ndetse bigateza imbere Seminari ya Karubanda n'igihugu muri rusange.”

Bimwe mu bikorwa Rutsindura azakomeza kwibukirwaho byagaragajwe na Bwana Alexis Mbaraga, uhagarariye abize muri Petit Seminaire Virgo Fidelis, wagarutse ku mateka ye yahaye Seminari umurage utazibagirana wa Volleyball.

Nk'uko yabisobanuye, Rutsindura Alphonse yabaye umurezi mu Iseminari ya Karubanda aba n’umutoza w’umukino wa Volleyball muri iyi Seminari ndetse aba n’umutoza w’ikipe y’igihugu ya volleyball y’abagore.

Yakomeje avuga ko impamvu Seminari yashyizeho irushanwa ryo kwibuka Rutsindura ari uko afitanye amateka yihariye n'Iterambere ry'umukino wa Volleyball muri iyi Seminari, kuko ari we watangije volleyball yo ku rwego rw’amarushanwa muri iyi Seminari. Ubwo yayitozaga ni bwo yinjiye mu cyiciro cya Gatatu mu marushanwa y'umukino wa Volleyball mu Rwanda. Buri mwaka, Rutsindura yabashije kuzamura ikipe ya Seminari ijya mu Kiciro cya kabiri ndetse ikomeza ijya no mu Kiciro cya mbere.

Aya mateka adasanzwe ya Rutsindura yatumye kugera n'ubu, Butare na Petit Seminaire Karubanda yarabaye igicumbi cy'umukino wa Volleyball kuko yareze kandi igikomeje kurera impano za benshi.

Ibigwi bya Rutsindura na Karubanda ntibyahagarariye aho kuko yaje no gutwara Igikombe cy'amarushanwa y'umukino wa Volleyball mu Rwanda. Rutsindura kandi yakomeje kugirirwa ikizere mu bakunzi b'umukino wa Volleyball kuko yaje no kuba umwe mu bayobozi b'Ishyirahamwe ry'Umukino wa Volleyball mu Rwanda.

Rutsindura Alphonse yatangiye kwigisha muri Petit Seminaire Virgo Fidelis mu mwaka wa 1984 aza kwicwa mu mwaka wa 1994 azize Jenoside yakorewe Abatutsi.

Tariki 8-9 Kamena 2024, ni bwo hazakinwa irushanwa ryo kumwibuka ryiswe "Memorial Rutsindura". Iri rushanwa rikaba rigiye kuba ku nshuro ya 20. Rikaba ritegurwa ku Bufatanye bwa Petit Seminaire Virgo Fidelis Karubanda, Ihuriro ry'Abize muri Seminari ya Karubanda, Ishyirahamwe ry'umukino w'Intoki wa Volleball mu Rwanda n'abandi bafatanyabikorwa.