"Nta bukristu butagira ubuzima", Padiri Kayisabe
Ubu ni ubutumwa Padiri Kayisabe Vedaste, Umunyamabanga w'Inama y'Abepiskopi Gatolika mu Rwanda, yagejeje ku bakorera muri Serivisi zitandukanye z'Inama y'Abepiskopi, nyuma y'umukino wabahuje mu rwego rwo kuzirikana kuri Sinodi no kugendera hamwe.
Ni umukino wabaye kuri uyu wa gatanu tariki 24 Gicurasi 2024, muri Lycée Notre Dame de Citeaux, ukaba warangiye ikipe y'Abihayimana itsinze iy'Abalayiki Amaseti 3 kuri 0.
Padiri Kayisabe Vedaste, Umunyamabanga w’Inama y'Abepisikopi mu Rwanda, wayoboye Igitambo cya Misa yabaye mbere y'uyu mukino, akaba n'umwe mu bakinnyi b'Imena mu ikipe y'Abihayimana, yashimye ubwitange bw'abakorera Inama y'Abepiskopi, yibutsa ko ari na ngombwa gukora Siporo kugira ngo bakomeze kugira ubuzima bwiza.
Uyu mukino waranzwe n'ishyaka ryinshi, ariko uza kurangira Abihayimana n'ubwo bari bake ugereranyije n'abo bari bahanganye, bagerageje kwitwara neza begukana intsinzi.
Yagize ati:”Duharanire yuko aho turi tuhashyira ubuzima kuko nta buzima butagira ubukirisitu nk'uko nta bukristu butagira ubuzima.”
Uwavuze mu izina ry'abakozi, yashimye uyu mwanya bahawe, avuga ko bidakwiye ko umukozi ahora mu mashini n'ibindi ngo yiyibagirwe cyangwa yibagirwe abandi.
Yagize ati:”Kuba umukozi ugahora ku mashini gusa, undi agahora mu bindi ntabwo byongera ubushuti, ahubwo buri wese yihugiraho. Iyo duhuye nk'uku bigaragaza ko dufitanye urukundo rutari urwo mu kazi gusa ahubwo no hanze y’akazi.”
Kuri ubu ku biro by'Inama y'Abepiskopi habarirwa abakozi basaga 40 bakorera muri Serivisi zitandukanye zirimo ubunyamabanga bukuru, Ibiro bishinzwe Itumanaho, Ibiro bishinzwe Uburezi n'Ubwigishwa, Komisiyo y'Ubutabera n'Amahoro, Urukiko rwa Kiliziya, Ibiro bishinzwe Ibikorwa bya Papa na Serivisi Ishinzwe Ubusugire bw'Ingo.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
