Caritas ya Diyosezi ya Butare yiyemeje kwita ku bakene ihereye mu miryango remezo
Abitabiriye inteko rusange ya Caritas ya diyosezi ya Butare yateranye ku wa mbere tariki 21 Werurwe 2022, bagaragaje ko igihe kigeze ngo ibikorwa bya Caritas bikorwe n’abakristu, bikorerwe mu miryango remezo hitabwaho abababaye n’abakeneye ubufasha bari mu ngo zigize umuryango remezo hatabanje gutegereza inkunga zizava mu nzego nkuru za Caritas.
Muri iyi nama yitabiriwe n’abashinzwe ibikorwa bya Caritas mu rwego rwa diyosezi, urwa paruwasi, n’abafatanyabikorwa, harebewe hamwe uko ibikorwa bya Caritas mu mwaka wa 2021 byagenze ndetse n’ibiteganyijwe mu mwaka wa 2022.
Myr Filipo Rukamba, umwepiskopi wa Butare yagaragaje ko muri uyu mwaka ibikorwa bya Caritas bizamanuka bikava mu nzego za Caritas bikajya mu maboko y’abakristu, bakagira uruhare mu kwita kuwo baturanye, cyangwa babana babona ubabaye, ukeneye ubufasha. Myr Filipo yagize ati “ Mu bikorwa byo muri uyu mwaka,turashaka kuzakorana n’abakristu mu nzego zo hasi ni ukuvuga mu maparuwasi, santarali no mu miryango remezo mu bikorwa bijyanye no kwita ku muntu ukuri iruhande ukennye, kwita ku muntu ukuri iruhande ugomba kuzamuka, kwita ku mwana ugomba kwiga, bakajya aho abantu batuye bakabafasha badategereje ko ibintu biva hejuru mu nzego za Caritas gusa ahubwo aribo bafasha abandi.”Akavuga ko ahubwo inzego za Caritas zo hejuru zigasaba inkunda ariko ibikorwa byinshi byakorewe mu ngo z’abakristu, aho batuye.
Ni nyuma y’uko mu nteko rusange ya Caritas Rwanda yateraniye i Kigali ku matariki ya 24-25 Gashyantare 2022, Abayobozi ba Caritas Rwanda bagaragaje ko uruhare runini rw’ibikorwa bya Caritas ruva mu nkunga iterwa , Abepiskopi basaba ko hakwigwa uburyo bushya bufasha Caritas Rwanda binyuze mu bakristu kugira ngo uruhare runini rw’ibyo ikora rutangwe n’abakristu, hatabanje gutegereza inkunga zitangwa n’imiryango mpuzamahanga.
Padiri Gilbert Kwitonda, umuyobozi wa Caritas ya Diyosezi ya Butare yagaragaje umusaruro w’ibikorwa bya Caritas muri iyi diyosezi birimo gufasha abarwayi bo mu byiciro bitandukanye, gufasha abanyeshuri batishoboye kubona amafaranga y’ishuri, kubakira abatishoboye ndetse no kubafasha kwiteza imbere.
Avuga ko mu myaka ya mbere bahaga umuntu inkunga zo kumubeshaho gusa, naho muri iki gihe Caritas yibanda ku bikorwa bifasha umuntu kugira uruhare mu kwiteza imbere. Aganira n’itangazamakuru gatolika.
Padiri Gilbert yagize ati “Mbere twitaga ku bufasha bw’igihe gito, bufasha umuntu muri ako kanya. Ubu, twatangiye uburyo bushya bugamije gufasha umuntu kugira ngo na we ubwe yifashe cyangwa azagire uruhare mu kwiteza imbere mu gihe kizaza.”Avuga ko muri ubu buryo, abagenerwabikorwa bagira uruhare mu bibakorerwa, kandi bukabigisha kwifasha aho guhora bateze amaboko abagiraneza.
Mu mwaka wa 2021, Caritas ya Butare yakoresheje ingengo y’imari ingana n’amafaranga 448.516.558; yakoreshejwe mu kwishyurira abatishoboye ubwisungane mu kwivuza, kubavuza, kubakira abatishoboye, no kwishyurira abana baturuka mu miryango itishoboye amafaranga y’ishuri.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
