Caritas ya Paruwasi Kacyiru-Kagugu yafashije abarwariye mu Bitaro bya Kibagabaga bakennye kwishyura umwenda babereyemo ibitaro
Muri gahunda yo kwizihiza umunsi mpuzamahanga w’abarwayi ku nshuro ya 31 muri Kiliziya, Caritas ya Paruwasi Gatolika ya Kacyiru-Kagugu yafashije bamwe mu bwayi bari mu bitaro bya Kibagabaga babuze ubwishyu kwishyura umwenda babereyemo ibyo bitaro, inagenera imfashanyo abari muri ibi bitaro ifite agaciro gasaga miliyoni n’ibihumbi Magana atatu.
Ni igikorwa Abakristu b’iyi Paruwasi bakoze ku cyumweru tariki 26 Gashyantare 2023, bayobowe na Padiri mukuru w’iyi Paruwasi Padiri Martin Uwamungu, Ubuyobozi bwa Caritas ku rwego rwa paruwasi, imiryango ya Agisiyo Gatolika n’urubyiruko.
Gahunda z’uyu munsi zabimburiwe n’igitambo cy’Ukarisitiya cyaturiwe muri ibi bitaro, abarwayi n’abarwaza bagezwaho ijambo ry’ihumure; zikomereza mu gusura no kushyikiriza inkunga abarwayi bose bo muri ibi bitaro, ndetse no gusangira ifunguro.
Nyandwi Emmanuel umaze imyaka 5 arwariye muri ibi bitaro, yavuze ko kubona abantu badafite ikibazo cy’ubuzima bafata umwanya bakabasanga kwa muganga aho barwariye bibaha icyizere ko batari bonyine, ko n’Imana ibakunda.Ashimira abakristu ba paruwasi Kacyiru Kagugu bahisemo kwifatanya n’abarwariye muri ibi bitaro.
Dr. Munyemana Erneste Umuyobozi Mukuru w’Ibitaro bya Kibagabaga yatangarije ko bishimiye kubona abagira neza bazaniye imfashanyo abaharwariye, ngo kuko hari n’abarwayi usanga batagira ababagemurira cyangwa bakabura ibyo ibanze mu burwayi bwabo, bityo kuba Paruwasi Kagugu yarahisemo kwizihiriza uyu munsi muri ibi bitaro bifitiye ibitaro n’abarwayi akamaro.
Abajijwe k’uko bakiriye igikorwa cyo kwishyurira bamwe mu barwayi bakennye amafaranga bari baereyemo ibitaro, Dr. Munyemana yavuze ko ari ibyo kwishimira kuko ibitaro bigenda bihura n’ikibazo cy’abaza kuharwarira badashoboye kwishyura ibyakoreshejwe mu buvuzi bwabo, bityo bikaba byagorana kugura ibindi mu gihe batabashije kwishyura ibyakoreshejwe. Avuga ko kuba Caritas ya Paruwasi Kacyiru Kagugu yishyuriye bamwe muribo biza gufasha ibitaro kugura ibindi bikenerwa n’ibitaro birimo imiti n’ibikoresho.
Padiri Uwamungu Martin,Padiri Mukuru wa Paruwasi Kacyiru Kagugu avuga ko nk’uko Kiliziya yifuje ko buri mwaka habaho umunsi wo kuzirikana abarwayi n’abarwazi, abakristu bakwiye kwigomwa mubyo bafite maze kuri uyu munsi bakabasanga aho barwariye, bakabahumuriza, ndetse bakagira n’igikorwa cy’urukundo babagaragariza hagamijwe kugira ngo ubutmwa bumvise kuri uwo munsi bushyirwe no mu bikorwa. Akavuga ko abakristu abereye padiri mukuru bamaze kubigira akamenyero, ko kuri uyu munsi w’abarwayi, umunsi w’umukene, mu gusoza adiventi n’igisibo begeranya inkunga maze bagafasha abababaye rwagati muribo, cyangwa bagasura abandi babona bakeneye ubufasha.
Inkunga rusange yatanzwe kuri uyu munsi ikaba igizwe n’ibikoresho by’isuku, imyambaro, n’ ibiribwa bifite agaciro gasaga miliyoni imwe n’ibihumbo magana atatu.Akaba yaraboneyeho kubwira abarwariye muri ibi bitaro ko Arkidiyosezi ya Kigali yamaze gushyiraho Padiri ushinzwe kwita ku barwariye muri ibi bitaro kimwe n’ibya Muhima, akaba ari Padiri Emmanuel Gatera, uzaba afite icyicaro muri Paruwasi Kacyiru Kagugu.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
