Centre des Jeunes Saint Vincent Save yatanze impamyabumenyi ku nshuro ya gatatu

Ni ibirori byabimburiwe n'igitambo cya misa yo gusabira umugisha certificat zahawe uru rubyiruko no kurusabira umugisha ngo bazashobora kubyaza umusaruro amasomo y'imyuga baherewe muri iki kigo.

Igitambo cya misa cyatuwe na Padiri mukuru wa paruwase ya Save Cyebambe Medard ari kumwe na Padiri Boniface umuyobozi wa Cartas Diyosezi ya Butare na Padiri Innocent ushinzwe urubyiruko muri Diyosezi ya Butare.

Padiri Medard yavuze ko urubyiruko rwa Save rwegerejwe ishuri ry'imyuga nk'igikorwa cy'impuhwe kugira ngo nabo babashe kwiga imyuga izabafasha kwiteza imbere. Yibukije urubyiruko n'ababyeyi uko mu ntangiro z'ishuri byari bimeze, ababyeyi batemera gusigarana abana bato ngo abangavu batewe inda batarageza ku myaka yubukure baze kwiga badafite izindi mbogamizi. Yakomeje avuga ko uko iminsi yagiye ishira ariko ababyeyi bumvise neza agaciro k'ishuri bakagenda baha abana uburenganzira bwo kwiga nabo bagasigarana abana babo. Kubera izo mpuhwe bagiriwe na kiliziya ndetse n'ababyeyi, padiri Cyebambe yabasabye nabo kuba abanyampuhwe no mu bikorwa bito bagiye gutangira gukora nyuma yo gusoza amasomo.

Padiri Kamulegeya Boniface umuyobozi wa Caritas Diyosezi ya Butare, yasabye urubyiruko gufata neza ibikoresho bahawe, amafaranga bazakorera bakayabyaza umusaruro. Yavuze ko Caritas yifuza kwigisha urubyiruko gucunga neza umushahara cyangwa se andi mafaranga babona buri munsi.

Yagize ati "Tubigisha kumenya gucunga neza amafaranga bazakorera muri iyi myuga bagiye gutangira gukora. Kuko byagaragaye ko urubyiruko rubona akazi rwarangiza rukishora mu nzoga no mu bindi biyobyabwenge bitandukanye, bityo amafaranga babonye bakayapfusha ubusa. Uyu mwaka twihaye intego yo gushyira mu bikorwa iyi gahunda yo kwigisha urubyiruko gucunga neza amafaranga n'undi mutungu wabo kugira ngo bazarusheho kugira ejo heza."

Madame Dusabe Denyse, umuyobozi w'akarere ka Gisagara wungirije ushinzwe imibereho myiza y'abaturage yavuze ko icyo bifuriza urubyiruko rurangije amasomo y'imyuga ari ukujya gushyira mu bikorwa ibyo bize kandi bagakurikiza gahunda yo kwizigama bakiteza imbere. Yavuze ko nk'akarere ka Gisagara bazakomeza gufasha urubyiruko kubona ibikoresho bikenewe kugira ngo bashobore kwivana mu bukene.

Mu buhamya bwurubyiruko rwahawe impamyabumenyi, Kinyamateka yaganirije Nimuragire Etienne wahawe impamyabumenyi mu ishami ryo gutunganya imisatsi n'ubwiza ari na we watsinze neza kurusha abandi, akaba yahawe ibikoresho bimufasha gutangira imirimo ya salon de coiffure nk'igihembo cy'uko yitwaye neza. Yavuze ko yishimye kubw'intambwe yateye ikaba ari intangiriro y'ubuzima bwiza kuri we.

Ati"Buri mwaka hari ibikoresho akarere kagenera urubyiruko rwize imyuga, tuzakomeza gufatanya na Caritas ndetse na Diyosezi kugira ngo urubyiruko rwize muri iri shuri rubashe gushyira mu bikorwa ibyo bize duhereye cyane cyane ku badafite ubushobozi bwo kwibonera ibikoresho by'imyuga bize."

Nikuze Gaudence, yabwiye Kinyamateka ko yahisemo kuza kwiga umwuga wo kudoda muri Centre des Jeunes Saint Vincent akaba yishimiye kuba ageze ku ntego yari afite. Yahawe imashini idoda nk'igihembo cy'uko yabaye indashyikirwa. Yashimiye Caritas yabigishije imyuga ariko ikanabahugura kubuhinzi nubworozi kuko benshi baturuka mu miryango ikora ubuhinzi.

Bamwe mu babyeyi baherekeje urubyiruko gufata certificat bavuga ko ntako bisa kugira umwana wize umwuga. Umukecuru Mutungirehe Fortunee wo mu kagali ka Munazi umudugudu wa Nyarure yabwiye Kinyamateka ko ashimishijwe no kuba umwana we abasha gukora umurimo umubeshaho kandi numuryango akaba awufasha. Yashimiye Caritas yashhyizeho ishuri rifasha urubyiruko rw ISave, benshi muri bo bakaba bamze kugira icyerecyezo kiza.

Mu bindi byaranze uyu munsi, umuyobozi wa Caritas Diyosezi ya Butare yemereye ababyeyi bafite abana babaye indashyikirwa igihembo cy'ubwisungane mu kwivuza kuko babaye ababyeyi beza, yaboneyeho gushishikariza abandi babyeyi bakizitira abana mu myigire kureka abana bakiga kandi neza kuko nta wundi murajye bakwiriye guha abana uretse ishuri.

Centre des Jeunes Saint Vincent yashinzwe muri 2021 ifite intego yo gufasha urubyiruko guhangana nibibazo byingutu bibugarije, ishuri ryatangiye rifasha abana babakobwa babyaye imburagihe, ribakira bafite nabana babo, bakajya babazana ku ishuri. Kuri ubu ni ishuri ryakira urubyiruko rwose nta kurobanura, ritanga amasomo mu gihe gito cy'umwaka umwe mu mashami y'ubudozi, ubwubatsi, ubusuderi no gutunganya imisatsi n'ubwiza.