Diyosezi ya Kabgayi irasaba urubyiruko kwitabira gukoresha neza ikoranabuhanga mu iyogezabutumwa bafatiye urugero kuri mutagatifu Carlo Acutis.

Mu kiganiro kirambuye Kinyamateka yagiranye na SAMVURA François umuyobozi w’urubyiruko muri Diyosezi ya Kabgayi yavuze ko bishimiye guhabwa impanuro n’umwepisikopi wa Diyosezi ya Kabgayi wabibukije gukoresha neza imbuga nkoranyambaga mu murongo w’iyogezabutumwa. Yagize ati ‘’Twahawe amahugurwa ku mikoreshereze y’ikoranabuhanga mu iyogezabutumwa dufatiye urugero kuri Mutagatifu Carlo Acutis. Habaye kandi gusangira uko ubutumwa buhagaze mu maparuwasi , kuganira ku myiteguro ya Forum y’urubyiruko.’’

Uyu mwaka hazaba Forum y’urubyiruko ku rwego rwa Diyosezi izabera muri Paruwasi ya Ruhango kuva tariki ya 18-12/07/2026 na Forumu y’urubyiruko ku rwego rw’igihugu izabera muri Diyosezi ya Byumba kuva tariki ya 19-23/08/2026.

Samvura akomeza avuga ko urubyiruko rwa Diyosezi ya Kabgayi barasabwa kwitegura neza izi Forum zose dore ko Forum isaba imyiteguro ihagije ku mpande zose.

Abahagarariye urubyiruko muri paruwasi barasabwa gutegura gahunda yo kwakira urubyiruko ruza mu biruhuko mu kitwa Welcome Vacance kandi bakajya banategura uburyo bwo gusoza neza ibiruhuko ari cyo bise( BYE BYE VACANCE )mu rwego rwo kubafasha kwinjira neza muri gahunda z’urubyiruko muri Paruwasi no mu bikorwa biba biteganyije. Ni mu gihe byagaragaye ko iyo abanyeshuri baje mu biruhuko batibona muri gahunda ziba ziteganyijwe ugasanga basinziriye.

Samvura yagize ati” Mu rwego rwo gukundisha urubyiruko cyane cyane urubyiruko rw’abanyeshuri imiryango y’Agisiyo gatolika no kuyitabira, amaparuwasi agomba gutegura gahunda ya Welcome vacance na bye bye vacance, kugirango basobanurire urwo rubyiruko iyo miryango y’Agisiyo gatolika. Muri iyi gahunda ya Welcome vacance na Bye Bye vacance, amaparuwasi agomba gushyiraho komite y’urubyiruko kandi muri iyo komite, buri muryango w’Agisiyo gatolika ukaba uhagarariwe.’’

Ku rundi ruhande ariko , Myr Balthazar Ntivuguruzwa umwepisikopi wa Diyosezi ya Kabgayi yashyizeho komisiyo igizwe n’abapadiri, urubyiruko n’abandi balayiki kugira ngo bige kuri Mutagatifu Carlo Acutis kandi bafashe abakristu kumumenya birushijeho bityo bajye bamwiyambaza. Myr Balthaza yifuje ko mutagatifu Carlo Acutis yakwisungwa cyane muri Diyosezi ya Kabagyi, asabaurubyiruko kurushaho kwitabira imiryango y’Agisiyo Gatolika nk’umurongo w’iyogezabutumwa muri Diyosezi .

Urubyiruko rugomba kwitabira gukoresha neza ikoranabuhanga mu iyogezabutumwa. Gutanga amakuru ku gihe y’ibikorwa baba bakoze muri Paruwasi zabo, kuko byagaragaye ko bakora ibikorwa byinshi ariko ntibimenyekane. Basabwe kandi gushishikariza aba Jeune kuzitabira Forum y’urubyiruko kandi bakabwira n’abandi.

Nyuma yo kuganirizwa ku mikoreshereze myiza y’ikoranabuhanga n’imbuga nkoranyambaga dufatiye urugero kuri Mutagatifu Carlo Acutis, hafashwe imyanzuro ikurikira: Gushyiraho itsinda ry’ikoranabuhanga muri buri paruwasi, Gutegura gahunda yo gukoresha imbuga nkoranyambaga mu iyogezabutumwa, Gukangurira urubyiruko gukoresha ikoranabuhanga mu nzira zubaka aho gusenya ,Gufatira urugero kuri mutagatifu Carlo Acutis no kumumenyekanisha mu bandi benshi . Kwamamaza Inkuru Nziza hakoreshejwe internet, no gusangizanya amakuru y’ibibera mu maparuwasi yose, hifashishijwe imbuga nkoranyambaga duhuriraho ( Whatsapp Groups, Status…)

Urubyiruko rwiyemeje gushyira mu bikorwa imyanzuro y’inteko rusange no kurushaho kwitabira gahunda za Diyosezi n’ibikorwa bitegurwa na Komisiyo y’urubyiruko kandi bakabisangiz abandi binyuze ku mbuga nkoranyambaga.