Diyosezi ya Nyundo yatashye Igice cya mbere cy'umushinga wa Centre Pastoral Aloys Bigirumwami izakorera muri paruwasi ya Muramba

Ni igikorwa cyabaye nyuma yo gutangiza ku mugaragaro urugendo rw’imyaka itatu Paruwasi ya Muramba izamara itegura yubile y’imyaka 100.

Muri uru rugendo hari ibikorwa byinshi Paruwasi yateganyije kuzakora birimo kubaka "Centre Pastoral Aloys Bigirumwami izaba igizwe n’inyubako zitandukanye.

Muri izo nyubako zose ziteganywa kubakwa, igice cya mbere cyari kigizwe n'inzumberabyombi cyamaze kurangira ku ruhare rw'Abakristu b'iyi Paruwasi. Mu gikorwa cyo kuyifungura ku mugaragaro Myr Anaclet Mwumvaneza akaba yashimiye abakristu kuba bariboneye ubushobozi ubwabo bwo kubaka iyi nzu mberabyombi badategereje inkunga ziva ahandi.

Padiri mukuru wa Paruwasi ya Muramba Jean Colbert NZEYIMANA na we Yashimiye abakristu uko bagira uruhare mu bikorwa by'iterambere rya paruwasi bakabikora ntawe basiganyije.

Umuyobozi w’akarere ka Ngororero Bwana NKUSI Christophe wari witabiriye iki gikorwa yashimiye abakristu ba Paruwasi ya MURAMBA kuba barabashije kwiyubakira inyubako nziza nk’iyo yiboneye.

Centre Pastoral Aloys Bigirumwami ni kimwe mu bikorwa biteganyijwe muri gahunda y'imyaka icumi ya Diyosezi ya Nyundo. Iyi Centre ikazubakwa mu rwego rwo kwibuka no guha icyubahiro Musenyeri Aloys Bigirumwami wabaye muri paruwasi ya Muramba mu gihe cy'imyaka 17.

Uretse iyi nzu mberabyombi imaze kuzura biteganyijwe ko iyi Centre izaba Ifite Inyubako zitandukanye zirimo amacumbi n'Izindi nyubako zizafasha abifuza gukora inama, umwiherero, amahugurwa n'Abandi bazifuza kuhatemberera. Izi nyubako nazo zikaba ziteganyijwe kubakwa mucyiciro cya kabiri cy'uyu mushinga.