Diyosezi ya Ruhengeri yakiriye Iserukiramuco Nyafurika ry’indirimbo zisingiza Imana
Ku mugoroba wo ku wa gatandatu tariki 26 Werurwe 2022, Ku Ngoro ya Bikira Mariya Umwamikazi wa Fatima muri Diyosezi ya Ruhengeri habereye iserukiramuco Nyafurika ry’indirimbo zisingiza Imana ku ncuro ya mbere. Ryitabiriwe n’amakorari yo mu bihugu binyuranye birimo: u Rwanda , Togo, Nigeriya, Ghana na Afrika y’Epfo.
Iri serukiramuco nyafurika ryateguwe ku bufatanye na Korali ya Kigali ryiswe The African Coral Gospel and Champional Ship (ACGCS) ryatangirijwe i Kigali ku wa kane tariki ya 24 Werurwe 2022 muri Intare Arena. Ryagombaga kubera muri Afurika y’Epfo mu mwaka ushize ntiryaba kubera icyorezo cya Covid-19 ryimurirwa mu Rwanda muri uyu mwaka.
Mu butumwa bwe, Myr Visenti Harolimana Umushumba wa Diyosezi ya Ruhengeri yagarutse ku byiza Imana yaremanye muntu birimo n’impano nyinshi yamuhaye nko guhimba indirimbo, kuririmba, kugorora amajwi no kubyina bakizihirwa. Yifurije ikaze abitabiriye iserukiramuco nyafurika ry’indirimbo zisingiza Imana, abifuriza kugubwa neza. Yishimiye ko iri serukiramuco ryabereye mu Rwanda by’umwihariko muri Diyosezi ya Ruhengeri. Yashimiye abagize uruhare muri iri serukiramuco nyafurika abifuriza umugisha w’Imana.
Dr. Albert Nzayisenga, umuyobozi wa korali ya Kigali yatangaje ko intego yaryo ari uguhuza abanyafurika binyuze mu muziki. Yagaragaje ko igitekerezo cy’iri serukiramuco cyaturutse ku banyamuziki baririmba indirimbo zisingiza Imana bo mu ma Korari anyuranye bo mu bihugu byinshi bya Afrika bifuje ko cyaba.
Kamanzi Axelle,Umuyobozi w’Akarere ka Musanze wungirije ushinzwe imibereho myiza y’abaturage yahamagariye abaturage gukomeza gusigasira umutekano, ashimira Diyosezi ya Ruhengeri yabakiriye.
Davide ADYEFI umuyobozi w’iri serukiramuco ukomoka mu gihugu cya Ghana yatangaje ko iki gikorwa cyateguwe igihe kirekire. Yashimiye abagiteguye n’abacyitabiriye ababwira ko ari bo batumye kibaho. Abifuriza gutera imbere mu muziki no mu byishimo; anagaragaza ko “Umuziki wahuza abantu muri Afrika”.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
