Ruhengeri: Kwizihiza isabukuru ya Paruwasi Bumara byahuriranye n'itangwa ry'Ubusaserdoti n'ishingwa rya Santarali nshya

Muri ibi birori, Diyakoni Gratien Kwihangana yahawe Isakaramentu ry'Ubusaserdoti naho Abafaratiri 10 ba Diyosezi Ruhengeri bahabwa Ubudiyakoni, abo ni Faratiri Arinatwe Eugène, Bizimana Maurice, Muhayeyezu Aeron, Niyonsaba Innocent, Nizeyimana Théogène, Nkoreyimana Valentin, Nsababera Narcisse, Niyikora Patric Consolateur, Ndayiringiye Ariston na Faratiri Kwizera Blaise.

Mu nyigisho Nyiricyubahiro Musenyeri Visenti Harolimana Umwepiskopi wa Diyosezi ya Ruhengeri yagejeje ku bahawe ubusaseridoti yabahamagariye kuba abasaseridoti banogeye umutima w’Imana. Yabibukije ko umusaseridoti mwiza ari uwumva ijwi ry’Imana kandi akaryumvira; ubona muri bagenzi be abasangirangendo basangiye ugupfa no gukira, kunga ubumwe, gufatanya na bagenzi be, azirikana ko Imana yamwigombye ikamukura mu kivunge ngo abe umwihariko. Yabamenyesheje ko umusaseridoti ari uharanira kurabagirana ubwiza bw’Imana, kwitangira abafite umutima washengutse, kwita ku bakene, indushyi, abatagira kivurira n’abandi bakeneye kwitabwaho.

Myr Visenti yabibukije ko umusaseridoti ari uwimenya, akitwararika, agahagarara neza, yemye; akumva ijwi ry’Imana rimutuma, ntaremererwe n’ibintu, amakuzo n’irari ry’umubiri. Yabahamagariye kuba abasaseridoti batiremereye, bataremereye bagenzi babo, bataremereye abo batumweho, bataremerewe n’ibiceri na feza. Yabijeje inkunga y’isengesho ngo babe abasaseridoti banogeye umutima w’Imana.

Agaruka ku isabukuru y’imyaka 11 Paruwasi ya Bumara imaze ishinzwe, Musenyeri Visenti Harolimana yashimiye iyi Paruwasi ku iterambere yagezeho,anasubiza ibyifuzo abakristu b’iyi paruwasi bamugejejeho. Yatangaje ku mugaragaro ko ashinze Santarali ya Nyundo yahoze ari Sikrisale ya Nyundo; Asaba abakristu gukomeza kongera ibikorwa bikenewe kugira ngo iyo Santarali ibe nziza. Yatangaje ko ashyigikiye umushinga wo kwagura Santarali ya Cyabingo;abizeza ubufasha n’ubuvugizi ku bindi bikorwa by’iterambere kugira ngo iyo Santarali ibe Santarali ibabereye.

Padiri Gratien KWIHANGANA yashimiye Imana yamutoye, ashimira abantu bose bagize uruhare mu rugendo rwabo rw’ubusaseridoti. By’umwihariko yashimiye Bikira Mariya wababaye hafi muri urwo rugendo akanamufatiraho intego agenderaho igira iti: «Ndi uwawe njyewe wese Bikira Mariya kandi n’ibyo ntunze byose ni ibyawe». Yashimiye Umwepiskopi wa Diyosezi ya Ruhengeri Myr Visenti Harolimana ubahoza ku mutima. Yashimiye ababyeyi babo babatoje uburere bwiza. Yatangaje ko bazaharanira kuba indahemuka mu gutunganya neza imirimo bahamagariwe.

Padiri Mukuru wa Paruwasi ya Bumara, Padiri Eugène Twizereyezu yagaragaje ko bafite ibyishimo byinshi by’isakramentu ry’ubusaseridoti ryatangiwe muri iyi Paruwasi,ahamya ko bakomeye ku ntego yo gukorera hamwe bafatanyije n’abakristu. Yashimye umuganda w’abakristu b’iyi Paruwasi mu kubaka iterambere ryayo». Agira ati: «Iyi Paruwasi mu myaka 11 imaze gufata umurongo. Tumaze kugera kuri byinshi dufatanyije n’abakristu n’ubuyobozi bwa Diyosezi yacu. Twashoboye kwiyubakira Kiliziya dusengeramo iri mu nziza kandi nini muri iyi Diyosezi yacu ya Ruhengeri. Twashoboye kubaka inzego z’abakristu. Dufasha abakristu gukunda kumva Ijambo ry’Imana no kurizirikana, gutagatifuza imbaga y’Imana, kwita ku bakene n’abatishoboye no kwishakamo imbaraga zo gukoresha mu butumwa bwacu. Intego yacu ni ugukomeza kujya mbere».

Umuyobozi w’Akarere ka Musanze Ramuri Janvier yashimiye Kiliziya Gatolika ku iterambere igeza ku banyarwanda, ayizeza gukomeza ubufatanye.

Uhagarariye abakristu muri Paruwasi ya Bumara yavuze ko bashyize imbere ikenurabushyo ryegereye abakristu, kandi bazakomeza kugira ishyaka ryo kuvaka Kiliziya.

Paruwasi ya Bumara yashinzwe na Musenyeri Visenti Harolimana Umwepiskopi wa Ruhengeri tariki ya 15 Nyakanga 2012, ayiragiza Bikira Mariya Umwamikazi wa Kibeho. Ifite abakristu basaga ibihumbi 28 bari mu miryangoremezo 197 yibumbiye mu ma sikirisale 16 ari mu masantarali 4 ariyo: Bumara, Cyabingo, Ngenge na Rugali.