HEC yemereye ICK gutangiza amashami y’Ubuforomo n’Ububyaza

Amwe mu magambo ari mu ibaruwa aragira ati, “Twishimiye kubamenyesha ko mwemerewe gutangiza icyiciro cya mbere cya Kaminuza mu mashami y’Ubuforomo n’Ububyaza nkuko mwari mwabisabye.”

Iyi ntambwe ikomeye ije ikurikira isuzuma ryakozwe na HEC ifatanyije n’Inama y’Igihugu y’Abaforomo n’Ababyaza(NCNM). Isuzuma ryabaye hagati yo ku wa 16-18, Kanama 2023.

Itsinda rishinzwe gusuzuma ryashimye ICK kuba yariteguye neza mbere yo gutangiza aya mashami nkuko byagaragaye ko ICK ifite ibikoresho byabugenewe, ibyumba by’ishuri, icyumba kirimo za mudasobwa, isomero, laboratwari y’ubumenyi, hamwe n’amacumbi y’abanyeshuri. Byongeye kandi, ICK yagaragaje abarimu bashoboye bazayifasha mu kwigisha aya mashami.

Umuyobozi mukuru wa ICK, Padiri Prof. Fidèle Dushimimana, yatangaje ko iki cyemezo cyabashimishije kuko hari hashize igihe kitari gito bitegura gutangiza aya mashami ndetse ko n’imyiteguro itari yoroshye.

Yakomeje avuga ko ari intambwe ikomeye kuri ICK ndetse ko bigiye no kurushaho kongerera agaciro amashami asanzwe muri ICK.

Padiri Prof. Dushimimana yashimiye by’umwihariko Musenyeri Smaragde Mbonyintege wahoze ari Umwepiskopi wa Diyosezi ya Kabgayi, na Musenyeri Balthazar Ntivugzira uriho ubu, ku ruhare rukomeye bagize kugira ngo aya mashami agaruke i Kabgayi. Yashimiye kandi Inama nkuru y’Amashuri makuru na Kaminuza ku kuba barihutishije icyemezo kibemerera gutangiza aya mashami.

Yakomeje ashimira Minisiteri y’Ubuzima mu Rwanda (MINISANTE), Minisiteri y’Uburezi (MINEDUC), n’abandi bose bagize uruhare mu kugera kuri iyi ntambwe.

Padiri Prof. Dushimimana yatangaje ko bagiye gutunganya ibyo basabwe na HEC ku buryo yizeza ababyifuza ko ICK izaba yatangije ibikorwa byo kwiga no kwigisha mu ntangiro z’ukwezi k’Ugushyingo 2023.

Amafaranga y'ishuri ateganijwe kuba hafi 650.000 Frw ku mwaka. Amafaranga y’icumbi hamwe n’ayo kurya azajya yishyurwa ukwayo.

Ku kijyanye n’amacumbi, Padiri Dushimimana yavuze ko ICK ifite ubushobozi bwo gucumbikira abagore n’abakobwa 150, cyane ko aho amasomo azatangirwa hari hasanzwe ikigo cyigamo abakobwa gusa. Abahungu n’abagabo bo bazajya biga baba hanze mu gihe ICK itarabona amacumbi yabo.

Padiri Prof. Dushimimana yagaragaje ko umwihariko wo kwiga aya mashami muri ICK, harimo kuba ari ishuri rituranye n’ivuriro rishya kandi rigezweho ry’ababyeyi (Maternity) n’Ibitaro bya Kabgayi bizafasha abanyeshuri kubona aho bimenyereza umwuga byoroshye. Yongeyeho ko kuba ICK iherereye mu gihugu rwagati (Akarere ka Muhanga) ari ikintu gikomeye kuko byoroheye buri wese kugera muri ICK aho yaba aturutse hose.

Kugeza ubu, bijyanye n’ubushobozi ICK ifite, iteganya gutangirana abanyeshuri 200 bazajya biga mu minsi isanzwe igize icyumweru. Kimwe mu bizagenderwaho ni uko umunyeshuri uzemererwa agomba kuba mu byo yize harimo aamasomo y'Ubutabire n'Ibinyabuzima(Biologie na Chimie), cyangwa se akaba yarize igiforomo mu mashuri yisumbuye. Ku bize amashami arimo Biologie na Chimie basabwa kuba baragize nibura inyuguti ya D muri ayo masomo, mu gihe abize mu myaka yo hambere hazarebwa uwagize nibura amanota 60%.

ICK yari isanzwe itanga impamyabumenyi y’icyiciro cya mbere cya kaminuza mu ishami ry’Uburezi n’icyiciro cya kabiri mu mashami atandukanye arimo Itangazamakuru n’Itumanaho, Uburezi, Ubumenyi bw’imibereho n’ubukungu, icungamutungo na Siyanse y’iterambere.