Ibyaranze ibirori bya ‘OPEN DAY’ muri Collège Saint Bernard Kansi

Ibi birori byari bigamije kumurika impano z’abanyeshuri biga muri ‘Collège Saint Bernard Kansi’ no kugaragaza mu ngiro amasomo atangirwa muri iri shuri.

Ibi birori byari byitabiriwe n’ababyeyi barerera muri ‘College Saint Bernard Kansi’ ndetse n’abafatanyabikorwa b’ishuri barimo Banki ya Kigali, O Genius Panda ifite urubuga abanyeshuri bifashisha mu gusubiramo amasomo yabo.

Mu ma saa yine za mu gitondo ni bwo ibi birori byatangiye, hamurikwa bimwe mu bikorerwa muri iri shuri.

Abitabiriye bose babanje kuzenguruka ahamurikirwa ‘stands’ aho basuye ahamurikirwaga ibijyanye n’ubuzima, ikoranabuhanga, ubucuruzi n’ubumenyi, iyobokamana, ubuhinzi, isuku n’ibindi.

Bimwe mu byaritswe harimo inkoni ikoranye ikoranabuhanga rishobora gufasha ufite ubumuga bwo kutabona kuba yamenya ko imbere ye hari umuntu muri metero imwe.

Mu bindi aba banyeshuri bagaragaje harimo isabune bakora bifashishije avoka, ndetse banasuzumye abitabiriye ibijyanye n’ubuzima bwabo.

Nyuma y’imurikabikorwa, ibirori byakomereje mu mbuga y’ishuri aho abanyeshuri baserutse mu ndirimbo, imbyino, imivugo ndetse n’ikinamico.

Ubutumwa bwatangiwe muri ibi birori bwibanze ku gushimira Umuryango w’Ababikira b’Ababerenaridine ku kuba ukigera mu Rwanda waratangiranye intego yo guteza imbere uburere n’uburezi bw’umwana w’umukobwa kuko mu 1957 ari bwo bahise bashinga ishuri i Kansi.

Mu kiganiro na KINYAMATEKA, Sr Immaculée Uwamariya umaze Imyaka 8 ayobora iri shuri kuko yariyoboye kuva muri 2017 avuga ko ‘OPEN DAY’ ibaye ku nshuro ya kabiri gusa ko bifuza kujya bayizihiza nibura rimwe mu myaka itatu kuko bifasha abanyeshuri kugaragaza impano zabo n'ibyo biga ndetse n’ishuri rikamenyekana.

Bamwe mu barerewe muri ‘College St Bernard Kansi’ bavuga ko umurere bakuye muri iri shuri ari bwo bwabafashije kwiyubaka batibagiwe no kubaka u Rwanda.

Ati "Ni umunsi ushimisha abanyeshuri."

Sr Uwamariya akomeza avuga ko icyerekezo cy'ishuri ari ugutanga uburere. Ati "Umuntu aramutse yize ibijyanye Siyansi gusa bidafite umutima ntacyo byaba bimumariye. Twifuza umukobwa ujyanye n'igihe ariko unagaragaza isura y'umukobwa ufite indangagaciro kandi ushoboye."

Kugeza Ubu, Ishuri ry’Icyitegererezo rya Mutagatifu Benerarido rya Kansi rifite abanyeshuri 750 biga mu mashami atanu ariyo Ubuforomo, Ubugenge, Ubutabire n'Imibare (PCM), Ubugenge Ubutabire n'Ibinyabuzima (PCB), Imibare, Ubugenge n'Ikoramabuhanga, ndetse n'Imibare, Ubutabire n'Ibinyabuzima.

Sr Uwamariya yongeraho ko abana nabo icyo bifuza ku babyeyi ari umwanya. Ati “Abana barashaka ko mubaha umwanya mukaganira na bo, mukamenya ibibazo byabo, inshuti zabo, ibibahangayikishije, ibibashimishije, mbese ntimwishimire gusa kuba abaterankunga kuko umwana ashobora kubona byose ariko akabura urukundo rwawe.”

Ashingiye kuri ibi yaboneyeho kwibutsa ababyeyi ko nabo bakwiye kwita ku burere bw’abana. Ati “Babyeyi, ni ngombwa ko mujya muha umwanya abana banyu. Nta murage usumba uburere kuko ushobora guha umwana amafaranga menshi ariko kuko atarezwe neza akayapfusha ubusa, ushobora kumuha amashuri ntayige kandi ntacyo yabuze kugira ngo yige. Niyo mpamvu rero duhamagariwe gufatanya mu gutanga uburere.”