Abakristu ba Diyosezi ya Nyundo bakoreye urugendo Nyobokamana i Kibeho

Uru rugendo rwari rubaye ku nshuro ya gatatu muri iyi Diyosezi ruri mu murongo Kiliziya Gatolika y’u Rwanda yihaye w’uko buri Diyosezi izajya ikorera urugendo nyobokamana nibura rimwe mu mwaka.

Abitabiriye uru rugendo nyobokamana bakoze ibikorwa binyuranye birimo gusura ibice bitandukanye bya Kibeho, gutarama, kuvuga ishapure n’ibindi.

Saa tanu zuzuye nibwo Umwepiskopi wa Diyosezi ya Nyundo, Musenyeri Anaclet Mwumvaneza yayoboye Igitambo cya Misa y’uru rugendo Nyobokamana.

Mu nyigisho ya Musenyeri Anaclet Mwumvaneza, yibukije abakristu kuzirikana ko iminsi y’igisibo ari ukureba aho "tutatunganiye Imana n’abavandimwe bacu, tukumva urukundo icyo ari cyo twirinda ishyari no kubangamira bangenzi bacu."

Akomeza agira ati "Iryo shyari rero, urifite ku mutima ushobora kumara iminsi 40 y’igisibo tukazajya muri pasika ariko ku mutima hakiri ikintu kigaragaza ko utagarukiye Imana."

Musenyeri Mwumvaneza yayoboye iki Gitambo cya Misa agaragiwe na Musenyeri Jean Marie Vianney Nsengiyaremye, igisonga cye n’abandi basaserdoti bo muri Paruwasi zinyuranye za Diyosezi ya Nyundo.

Mu kiganiro na KINYAMATEKA, Musenyeri Anaclet Mwumvaneza yashimiye Abakristu ba Diyosezi ya Nyundo ku kuba umubare w’abitabiriye wariyongereye ugereranyije n’umwaka ushize aho hari hitabiriye abasaga 2500 mu gihe kuri ubu hitabiriye abaga ibihumbi 4500.

Akomeza asaba abakiristu ba Diyosezi ya Nyundo kurushaho kumva agaciro k’urugendo Nyobokamana I Kibeho kuko nta muntu ukora urugendo Nyobokamana ngo atahe uko yagiye.

Ati “Yego ni urugendo ruvunanye rimwe na rimwe kubera amafaranga y’itike n’ibindi ariko muri bike cyangwa byinshi Imana yaduhaye ntabwo twayiburira ibituma tuza hano i Kibeho kugira ngo twumve ubutumwa bw’Umubyeyi Bikira Mariya.”

Akomeza agira ati “Ubu ubutumwa bwa Bikira Mariya turabwumva kuri radiyo, tukabusoma, ariko iyo wahigereye n’ikirenge cyawe, ntabwo usubira uko waje.”

Jean Baptiste Nkundabaramye waturutse muri Paruwasi ya St Pierre Kibuye, akaba akoze urugendo Nyobokamana i Kibeho ku nshuro ya 5, avuga ko icyo akura i Kibeho ari ukwitagatifuza, no kumenya ko urugendo rwa muntu ari urugana Imana.

Bamwe mu bakrisitu bitabiriye uru rugendo Nyobokamana nabo bemeza ko nta muntu ushobora kugera i Kibeho, hanyuma ngo atahe uko yaje.

Kibeho hafatwa habaye ahantu hatagatifu kuva tariki ya 28 Ugushyingo 1981 kuko ari bwo Alfonsina Mumureke wigaga muri Koleji ya Kibeho yabonekewe bwa mbere na Bikira Mariya. Nyuma ye habonekewe kandi Nataliya Mukamazimpaka wabonekewe bwa mbere tariki ya 12 Mutarama 1982, mu gihe Mariya Klara Mukangango we yabonekewe bwa mbere tariki ya 02/03/1982.

Kimwe mu byo avuga byamutangaje ni ukwibonera Nataliya Mukamazimpaka wabonekewe bwa mbere na Bikira Mariya tariki ya 12 Mutarama 1982.

Yongeraho ko umuntu uzi Bikira Mariya akwiye kurangwa no gufasha by'umwihariko akubaha umubyeyi kuko Bikira Mariya ari umubyeyi w'Ijuru n'Isi.

Janviere Uwiragiye waturutse muri Paruwasi ya Kavumu, Zone Pastorale ya Gisenyi avuga ko yari afite amatsiko yo kumenya Kibeho kuko yumvaga abantu benshi bahajya gusa ngo nyuma yo kuhabona ibintu byinshi bidasanzwe yiyemeje kujya ahaza kenshi.

Nk'umuntu ukiri urubyiruko avuga ko urubyiruko rukwiye gukora ingendo nyobokamana kuko bibafasha kwirinda ingeso mbi, bakirinda kujya kure y'Imana, bakegerana n'Imana mu buzima bwa buri Munsi.

Umwe mu rubyiruko rwitabiriye uru rugendo Nyobokamana, Nsengimana Patrick waturutse muri Kibuye, akaba ageze i Kibeho ku nshuro ya 3, avuga ko impamvu adashobora kurusiba ari uko rufasha umuntu kwegerana n'Imana, kwitagatifuza no kumenya amateka ya Kibeho nka hamwe mu hantu 13 hemewe amabonekerwa ku Isi.

Avuga ko nk'abantu bakuze bakora ibishoboka byose kugira ngo izo ngendo zitabirwe n'urubyiruko ku buryo nabo bamenya ko ari ukwitagatifuza ndetse bazanasigasire uwo murage.

Nkundabaramye yongeraho ko uwageze i Kibeho akwiriye guhinduka mu myifatire, imibanire ye n'abandi cyane cyane mu rugo iwe n'aho atuye.