Inshamake y'amateka ya College Saint Bernard Kansi

Iri shuri riherereye mu Karere ka Gisagara, Umurenge wa Kansi, Akagari k’Akaboti, riherereye mu birometero 13 uvuye mu Mujyi wa Huye rikaba ryarashinzwe mu mwaka w’1957 n’Ababikira bo mu Muryango w’Ababernardine.

Aba babikira bashinze iri shuri bafite intego yo guteza imbere uburere n’uburezi by’umwana w’Umukobwa ku buryo n’icyerekezo cy’ishuri ari “Uburezi bufite ireme, umukobwa ushoboye.”

Kimwe mu byaranze iri shuri ni uguhindura amazina bijyanye n'ibihe Igihugu cyagendaga kinyuramo.

Mu 1957, iri shuri ryatangiye ryitwa Ecole Ménagère post Primaire, mu 1959 rihindura izina ryitwa Ecole Ménagère pedagogique avec internat, ryongera guhindura izina mu 1964 aho ryiswe Ecole de monitrices auxiliaires avec internat.

Ntibyaciriye aho kuko mu 1969 iri shuri ryiswe Collège des Hummanites modernes ayant un cycle de 6 ans, mu 1981 ryitwa Ecole de nutrition et diététique ayans un cycle de 6 ans, mu gihe muri 2000 aribwo ryafashe izina rya Collège Saint Bernard Kansi.

Mu mwaka wa 2000 iri shuri ryatangiye kwigisha amasomo yo mu cyiciro rusange “Tronc commun” kugeza muri 2009 ubwo ryatangizaga icyiro cya kabiri cy’amashuri yisumbuye, aho ryahereye ku Ishami rimwe ry’Ubugenge, Ubutabire n’Imibare (PCM).

Aya mashami yakomeje kwiyongera kuko muri 2018 hafunguzwe Ishami ry’Imibare, Ubutabire n’Ibinyabuzima (MCB), muri 2019 hafungurwa irindi ry’Ubugenge, Ubutabire n’Ibinyabuzima (PCB) ndetse ubu rikaba rinafite Ishami ry’Ubuforomo.

Kugeza ubu, iri shuri rifite abanyeshuri basaga 750.