Icyo wamenya kuri Paruwasi ya Kibangu ihimbaza Yubile y’imyaka 25 ishize havutse imiryangoremezo muri iyi paruwasi.

Paruwase ya Kibangu yashinzwe mu 1962, ibyawe na Misiyoni ya Kanyanza,ifite imiryangoremezo 209. Uwizeye Narcisse umukristu wa Paruwasi ya Kibangu akaba n’umuyobozi w’inama nkuru ya Paruwasi, mu kiganiro yagiranye na Kinyamateka yavuze ko umuryangoremezo wababereye inzira nyayo yo kuvugurura ubukristu bwabo.

Yagize ati” Mbere y’uko imiryangoremezo ishingwa abakristu bajyaga mu misa ku cyumweru bagataha. Bakazongera guhura ari uko habaye inama y’umurenge cyangwa basubiye mu misa ku cyumweru. Imiryangoremezo ije, abakristu babonye umwanya wo gusangira ijambo ry’Imana n’ubuzima bitabaye ku cyumweru gusa. Kuko rimwe mu cyumweru abakristu barahura bagasengera hamwe mu muryangoremezo. Uko guhura rimwe mu cyumweru mu muryangoremezo byagize akamaro gakomeye cyane kuko wabaye umwanya wo guhuza abantu begeranye ngo basenge kandi basangire n’ubuzima. Umuryangoremezo wadufashije gucika k’ubukristu bw’ikivunge. Kuko ubu abantu bahurira aho bari bagasenga kandi bagashaka n’ibisubizo by’ibibazo”

Umuyobozi w’inama nkuru ya Paruwase akomeza avuga ko mu miryangoremezo ubukristu bwarushijeho kubabyarira ubuvandimwe kuko aho batuye basangira ibinyobwa, ibiribwa ndetse n’isengesho hamwe n’ijambo ry’Imana. Ati”Imiryangoremezo yadufashije kongera ibikorwa by’urukundo. Kuko duturanye umuntu ufite ikibazo turamumenya, uwambaye ubusa n’ugiye kuburara tukamumenya bigatuma tumuba hafi hakiri kare kandi ku gihe.”

Agaruka kuri bimwe mu byiza by’Imiryangoremezo muri Paruwasi ya Kibangu, Narcisse yavuze ko imiryangoremezo yabafashije kumva ko kiliziya ari iyabo. Gutanga ituro ryubaka kiliziya ntawe bikibereye imbogamizi kuko baritangira hamwe mu miryangoremezo kugira ngo ingoma y’Imana yogere hose. Agira ati”Umuryangoremezo wagize uruhare rukomeye mu kugabanya amacakubiri n’amakimbirane yavukaga hagati y’abakristu, ubumwe n’ubuvandimwwe byariyongereye cyane. Uyu nunsi kumenya ababaye mu buryo bwa Caritas biroroshye cyane, ubabaye umuryangoremezo uramumenya kandi ukamufasha.

Kuva mu mwaka w’I 2000, imiryangoremezo yadufashije kugera ku bikorwa byinshi by’ubukristu birimo gufasha abatishoboye badafite aho baba tukabashakira aho kuba, wadufashije kubona inkunga yo kuvugurura paruwasi yacu yavuguruwe muri 2012 ubwo hizihizwaga Yubile y’imyaka 50 ya Paruwasi. Kiliziya ikaba yaravuguruwe ku bushobozi bwaturutse mu miryangoremezo. Ni igihe kiza cyo kwishimira ibyagezweho n’abakristu binyuze mu miryangoremezo

Paruwasi ya Kibangu ni yo yabyaye paruwasi ya Gasovu. Mu misanzu yakusanyijwe mu miryangoremezo niho havuye inkunga yo kubaka Kiliziya ya Gasovu nk’umwana twari tubyaye twagomba gutekesha. Twabashije gusura abagororwa mu igororero rya Muhanga tubafasha kubona ifunguro n’imyambaro biturutse ku miryangoremezo.

Agaruka ku dushya turi muri Paruwasi ya Kibangu bakeshya Udushya imiryangoremezo. Umuyobozi w’inama nkuru yavuze ko havutse imiryangoremezo y’abana ishamikiye ku y’abakuru. Ati” Kera hari hariho icyo twitaga utugoroba tw’abana bagahurira ahantu hadasobanutse, ariko ubu twashyizeho umuryangoremezo w’abana ushamiye ku w’abakuru. Abana barahura bakigishwa indangagaciro nkirisitu bafashijwe n’urubyiruko n’abantu bakuru bari mu muryangoremezo.

Hari imiryangoremezo yabashije gushyiraho gahunda y’ibimina ku buryo byabafashije kujya batanga ituro rya Kiliziya binyuze mu kimina cy’umuryangoremezo. Ikindi ni gahunda y’insina y’umuryangoremezo twashyizeho tuyivanye kuri Paruwasi ya Kanyanza umubyeyi wacu. Tukaba tumaze umwaka umwe dutangije gahunda y’insina y’Umuryangoremezo. Tumaze gukusanya amafranga agera kuri miliyoni 2 n’ibihumbi 230 biturutse mu nsina y’umuryangoremezo.

Narcisse asoza avuga ko kwizihiza Yubile y’imyaka 25 imiryangoremezo ivutse muri paruwasi ya Kibangu bibateye ibyishimo byinshi kuko umuryangoremezo bawukesha byinshi byabateje imbere mu bukristu. Agira ati”Ni umunsi w’ibirori ukomeye ku bakristu b’iyi paruwasi, dore ko byanabanjirijwe n’amarushanwa y’imikino itandukanye, hakaba hazanahembwa ababaye aba mbere. Muri buri muryangoremezo hakaba harateguwe ikitwa umusangiro w’umuryangoremezo, aho bazasangirira hamwe nk’uko intumwa zabigenzaga.

Umuryangoremezo ni aho abakristu begeranye bahurira bagasenga kandi bagasangira ubuzima umuryangoremezo uba ugizwe n’ingo zigera kuri 12 z’abantu baziranye.

Paruwasi ya Kibangu yizihije Yubile y’imyaka 25 imiryangoremezo ivutse, hanizihizwa Yubile y’imyaka 2025 yo gucungurwa kwa muntu na Yubile y’imyaka 125 ivanjili igeze mu Rwanda. Iyi paruwasi maze kubyara Paruwase 2 ari zo Nyabinoni na Gasovu. Ifite imiryangoremezo igera kuri 209, abakristu bagera ku bihumbi 11430 bibumbiye mu ngo 1701. Ikagira uturere rw’ubutumwa 7 na Santare 4.