Ihuriro ry’Abanyamuziki Gatolika mu Rwanda rigiye guterana ku ncuro ya gatandatu
Ubuyobozi bw’ihuriro ry’abanyamuziki gatolika mu Rwanda buratangaza ko imyiteguro yo kwakira ihuriro rya 6 ry’abanyamuziki igeze ahashimishije kandi ingingo zizigirwamo zikazagira uruhare mu gutera imbere umuziki gatolika hagamijwe kunoza Liturujiya muri Kiliziya.
Aganira na Kinyamateka, Eliazar Ndayisabye umuyobozi w’iri huriro yayitangarije ko iri huriro rizamara iminsi itatu rizabera i Kigali muri Paruwasi Regina Pacis kuva ku wa gatanu tariki 30 Nzeri kugeza ku cyumweru tariki 2 Ukwakira 2022.
Ni ihuriro rizitabirwa n’abanyamuziki gatolika barimo abasanzwe bigisha umuziki, abayobozi b’amakorari, abacuranzi, abahanzi b’indirimbo za Kiliziya Gatolika n’abaririmbyi mu byiciro bitandukanye haba mu ndirimbo zikoreshwa muri Liturujiya ya Misa ndetse n’indirimbo gatolika zisingiza Imana.
Insanganyamatsiko y’iri huriro rya 6 iragira iti “ Twunge Ubumwe mu ndirimbo za Liturujiya”. Hakaba hateganyijwe ibiganiro bizatangwa n’abahanga mu muziki gatolika bazwi mu Rwanda barimo abapadiri, ahiyeguriyimana, abacuranzi, abasheshe akanguhe n’abakiri bato, bo mu bihe byose .
Muri iri huriro hatumiwemo na Nyiricyubahiro Myr Visenti Harolimana Umwepiskopi wa Diyosezi Ruhengeri akaba anakuriye Komisiyo ya Liturujiya mu nama y’Abepiskopi Gatolika mu Rwanda. Eliazar Umuyobozi w’iri huriro avuga ko iri huriro rigengwa na n’inzego za Kiliziya Gatolika mu Rwanda ku isonga haza inama y’abepiskopi gatolika mu Rwanda kuko intego yaryo nyamukuru ari ubufatanye mu kunoza liturujiya muri Kiliziya, bityo bakaba bagengwa n’ubuyobozi bwa Kiliziya, ari nayo ibagenera umurongo bagomba gukoramo.By’umwihariko Kiliziya Gatolika mu Rwnda ikaba yararigeneye padiri urishinzwe ari we Padiri Jean Pierre Rushigajiki, wo muri Arkidiyosezi ya Kigali.
Muri iri huriro hazabamo kandi n’umwanya wo kujora no kureba indirimbo zikoreshwa muri iki gihe haba hari izifite amakosa adahuje n’amabwiriza ya Liturujiya zikosorwa.Hazabamo kandi n’umwanya wo gukusanya indirimbo zagiye zihimbwa mu bihe bitandukanye ariko ntizihabwe uburenganzira bwo gutangira gukoreshwa muri Kiliziya; nyuma yo gukusanywa zikazashyikirizwa inzego za Kiliziya zishinzwe gutanga uburenganzira ku bihangano mbere yo gutangira gukoreshwa mu Kiliziya.
Ihuriro ry’abanyamuziki gatolika mu Rwanda rihuza abanyamuziki, abahanzi, abacuranzi n’abandi bagira uruhare mu kuyobora no kwigisha indirimo za kiliziya gatolika zaba izikoreshwa muri liturujiya n’izifashishwa mu gusingiza Imana, bo mu madiyosezi yose yo mu Rwanda. Rifite icyicaro muri Paruwasi Ktedrali yitiriwe Mutagatifu Mikayile(St Michel) i Kigali. Biteganyijwe ko iryo uyu mwaka rizabera muri Paruwasi Regina Pacis Remera, rikazitabirwa n’abanyamuziki gatolika bagera ku 1.500.
Ihuriro rya mbere ryateranye tariki 17 Nyakanga 2017 rihuza abarimu b’umuziki gatolika,abaririmbisha mu Misa, abacuranga, abahimba indirimbo zisingiza Imana n’iza Liturujiya. Intego yabo ikaba yari ugutegura uburyo buhoraho bwo guhugurana, kungurana ibitekerezo no gushyiraho uburyo bwagutse bwo guteza imbere umuziki gatolika.Irya mbere ryabereye muri Paruwasi Ste Famille, irya kabiri ribera muri Paruwasi Regina Pacis Remera, irya gatatu ribera muri Paruwasi St Michel, irya kane ribera muri Paruwasi Katedrali ya Ruhengeri, irya gatanu ribera muri Paruwasi Regina Pacis Remera, ari naho hagiye kubera n’irya gatandatu
Ibitekerezo (0)
- Nta gitekerezo kirahaba. Ba uwa mbere utanga igitekerezo.
