Karidinali Kevin Farrell arasaba ko urubyiruko rwahabwa ijambo mu gutegura ihuriro ryarwo
Karidinali Kevin Farrell mu butumwa yagejeje ku bitabiriye Inama itegura ihuriro mpuzamahanga ry’urubyiruko bateraniye i Fatima mu gitondo cyo kuwa gatatu tariki 19 Ukwakira 2022, yagaragaje ko abashinzwe imyiteguro bakwiye guha umwanya urubyiruko rukabigiramo uruhare.
Mu nama y’iminsi itatu iri guhuza abashinzwe urubyiruko mu bihugu bitandukanye bateraniye Fatima muri Portugali mu rwego rwo gutegura ihuriro mpuzamahanga ry’urubyiruko rizabera muri iki gihugu muri Kanama Karidinali Kevin Farrell yasabye abahagarariye urubyiruko kuruha rugari rukagira uruhare mu bikorwa bijyanye n’imyiteguro y;iri huriro, cyane cyane izishingiye kuri gahunda ya Sinodi y’Abepiskopi iri gukorwa mu bihugu byose byo ku isi.
Karidinali Kevin Farrell ukuriye Dekasiteri ishinzwe abalayiki, umuryango n’ubuzima i Roma ari na yo yahawe inshingano zo gutegura iri huriro yavuze ko ashingiye ku mibare igaragazwa n’inzego zahawe inshingano zo gutegura iri huriro ku bufatanya n’Inama y’Abepiskopi muri Portugali, hari icyizere cy’uko iri huriro rizagenda neza ku gipimo cyo hejuru.
Akomoza ku ruhare urubyiruko rugomba kugira mu mpinduka zigamije iterambere muri Kiliziya, Karidinali Kevin Farrell avuga ko nk’uko umushumba wa Kiliziya Gatolika ku isi Papa Fransisiko yabigaragaje muri gahunda ya Sinodi y’abepiskopi irimo gukorwa hirya no hino ku isi, urubyiruko rufite umwanya ndasimburwa wo kuba abarwanashyaka beza bajyana n’impinduka zigenda zikorwa muri Kiliziya, asaba abahagarariye urubyiruko kurutega amatwi aho ruri mu madiyosezi rukagaragaza ibitekerezo byarwo mu mpinduka y’imigendekere y’iri huriro ndetse n’irizaba ku rwego rw’amadiyosezi rizizihirwa ku munsi mukuru wa Kristu Umwami w’ibiremwa byose.
Asoza ubutumwa yageneye urubyiruko, Karidinali Kevin Farrell avuga ko urubyiruko rukwiriye gufatira urugero ku mubyeyi Bikira Mariya utarazuyaje maze akajya gusura mubyara we Elizabeti amushyiriye inkuru nziza; urubyiruko narwo rukishimira kujya kuba abahamya b’ibyo rwabonye.
Muri iyi nama itegura iri huriro mpuzamahanga, urubyiruko gatolika rwo mu Rwanda ruhagarariwe na Padiri Evariste Nshimyumuremyi Umunyamabanga wa komisiyo ishinzwe iyogezabutumwa ry’urubyiruko mu Nama y’Abepiskopi Gatolika mu Rwanda na Rugamba Cyprien Umuyobozi wa Komite y’igihugu y’urubyiruko gatilika mu Rwanda.
Ihururo mpuzamahanga ry’urubyiruko ku isi riteganyijwe kubera mu mujyi wa Lisbon mu gihugu cya Portugali kuva tariki 1-6 Kanama 2023.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
