Karidinali Matteo Zuppi yerekeje mu Bushinwa gushaka igisubizo cy’intambara yo muri Ukraine

Itangazo ryashyizwe ahagaragara n’ibiro bya Vatikani bishinzwe itumanaho(Holy See Press Office) kuri uyu wa Kabiri byatangaje ko muri uru ruzinduko, Karidinali Matteo Zuppi azamara iminsi itatu ni ukuvuga kuva tariki 13-15 Nzeri mu Bushinwa; akazagirana ibiganiro n’abayobozi b’iki gihugu barimo na Minisitiri w’intebe ku cyakorwa kugira ngo intambara u Burusiya bwagabye kuri Ukraine ihagarare binyuze mu nzira y’ibiganiro.

Iri tangazo rivuga ko uru rugendo ari indi ntambwe ishingiye ku cyifuzo cya Papa Fransisiko cyo gushaka igisubizo ku ntambara ibera muri Ukraine hagati y’u Burusiya n’iki gihugu; iki gisubizo kiganisha ku mahoro arambye kigashakwa mu buryo burengera ikiremwamuntu hakoreshejwe ibiganiro n’ubwumvikane aho kwifashisha intambara.

Mu kiganiro yagejeje ku bitabiriye ihuriro “ Audacity for Peace” ryateguwe n’umuryango wa Sant Egidio i Berlin mu Bugade mu cyumweru gishize, Karidinali Zuppi yavuze ko mu rugendo rwo gushaka amahoro impande zombi zigomba kubigiramo uruhare n’ubushake. Yavuze ko gushaka amahoro atari ikintu umuntu ahatira undi ahubwo ari inzira itegurwa, buri wese akayibonamo kandi akanamenya icyo asabwa kugira ngo ayo mahoro agerweho. Avuga kandi ko u Bushinwa ari rumwe mu mpande zishobora kuba zagira icyo zikora kugira ngo amahoro akenewe muri Ukraine agerweho.

Tariki 5-6 Kamena 2023 nibwo Karidinali Matteo Zuppi yatangiye urugendo rugamije gushaka igisubizo ku ntambara hagati y’u Burusiya na Ukraine, arutangirira i Kyiv muri Ukraine aho yabonanye na Perezida Volodymyr Zelensky w’iki gihugu bagirana ibiganiro. Ku wa 28-29 Kamena uyu mwaka, Karidinali Matteo yakomereje uru rugendo i Moscow mu Burusiya, aho yagiranye ibiganiro na bamwe mu bayobozi b’iki gihugu barimo Minisitiri w’ububanyi n’amahanga w’u Burusiya, Umukuru w’idini ya Orthodox n’abandi bayobozi.

Ku wa 17-19 Nyakanga 2023, Karidinali Matteo Zuppi yasubukuye uru rugendo, yerekeza i Washington muri Leta Zunze Ubumwe z’Amerika, agirana ibiganiro n’abayobozi bakuru b’iki gihugu barimo na Perezida Joe Biden.