Karidinali Richard Baawobr wari Ukuriye Ishyirahamwe rihuza Abepiskopi Gatolika bo muri Afurika na Madagasikari SECAM arashyingurwa kuri uyu wa Kane

Nyuma y’uko ku ya 5 Mutarama 2023 umurambo wa Karidinali Richard uvanywe i Roma aho yitabiye Imana ukazanwa mu gihugu avukamo cya Ghana, kuri uyu wa 11 Mutarama 2023 nibwo hatangiyee imihango yo kumusezeraho bwa nyuma, akazashyingurwa ejo ku wa kane tariki 12 Mutarama 2023, muri Kiliziya Katedarali yitiriwe Mutagatifu Andereye ya Wa, yari abereye Umwepiskopi.

Karidinali Richard yari umwe mu bakaridinali 21 batowe na Papa Fransisiko ku wa 29 Gicurasi 2022; ku munsi wo guhabwa ibimeneyetso by’ubukaridinali no guhabwa umugisha wa gitumwa wabereye i Roma ku wa 27 Kanama 2022, Karidinali Richard na we yagiye i Roma gusa ntiyitabira uyu muhango ku mpamvu z’uburwayi butunguranye bwatumye ajyanwa mu bitaro ikitaraganya, nuko ntiyakomezanya na bagenzi be. Gusa ntibyamubujije kugirwa umukaridinali wa Kiliziya nka bagenzi be.

Nyuma y’igihe kigera ku mezi atatu arwariye mu bitaro bya Agostino Gemelli University Hospital i Roma, ku wa 27 Ugushyingo 2022 nibwo hamenyekanye inkuru ibabaje y’urupfu rwe; bitangazwa ko yazize indwara y’umutima yari amaranye igihe.

Karidinali Richard Baawobr wari umupadiri mu muryango w’Abamisiyoneri b’Afurika yatorewe na Papa Fransisiko kuba Umwepiskopiwa Diyosezi ya Wa muri Ghana muri Gicurasi 2016. Ku wa 30 Nyakanga 2022, mu nama yahuje Abepiskopi bo muri Afurika na Madagasikari bibumbiye mu ishyirahamwe SECAM, Abepiskopi bamutorera kuba umuyobozi w’iri shyirahamwe.

Karidinali Richard Kuuia Baawobr yabaye umukaridinali wa gatatu uvuka mu gihugu cya Ghana,nyuma ya Karidinali Peter Dery witabye Imana, na Karidinali Peter Appiah Turkson ukorera ubutumwa i Roma.

Imana imwiyereke iteka, aruhukire mu mahoro.