Komisiyo y’Ubutabera n’Amahoro ikomeje guhugura Abapadiri n’Abiyeguriye Imana mu bijyanye n'isanamitima

Aya mahugurwa ari kubera muri Home Saint Jean ku Kibuye, yateguwe na Komisiyo y’Abepisikopi y’Ubutabera n’Amahoro hagamijwe kongerera ubushobozi Abapadiri n’Abiyeguriye Imana mu bijyanye no gusobanukirwa n’ibikomere by’umutima ndetse n’uburyo bwo kwakira no gutega amatwi uwahuye n’ibyo bikomere.

Atangiza aya mahugurwa, Padiri Valens Niragire, Umunyamabanga wa Komisiyo y’Abepisikopi y’Ubutabera n’Amahoro (CEJP) yavuze ko aya mahugurwa ari ingirakamaro ari yo mpamvu asaba abari kuyahabwa kuzayakurikira neza.

Ati “Gutega amatwi ni umuti uvura. Iyo duteze amatwi abo dushinzwe biba ari uburyo bwo kubafasha gukira bimwe mu bikomere babana nabyo bibahutaza kandi bikabahungabanya mu buzima bwabo. Abihaye Imana n’Abapadiri bahamagarirwa gufasha ababagana, bakabatega amatwi kandi nabo bakamenya kwitega amatwi.”

Avuga ku mpamvu aya mahugurwa ari ingenzi, Padiri Niragire avuga ko uko imyaka igenda ishira hagenda haboneka ibihungabanya abantu byinshi, bityo ko ari ngombwa ko abasaseredoti n’abihaye Imana bamenya ibyo bikomere muntu agendana n’uburyo bwo kumutega amatwi ngo bamufashe nk’ubutumwa bahamagarirwa kugira ngo babafashe kudaheranwa n’ibyo bikomere.

Mu kurushaho kumvikanisha ibi, Sr. Epiphanie Umubyeyi ukorera ubutumwa muri Komisiyo y’Ubutabera n’Amahoro yagaragaje ko Ubushakashatsi bw’ Ikigo cy’Igihugu gishinzwe Ubuzima (RBC) bwo muri 2018 bugaragaza ko umuntu umwe muri batanu bari hagati y’imyaka 14 na 65 aba afite uburwayi bwo mu mutwe cyangwa se bukomatanyije.

Sr. Umubyei ati “Iyi shusho y’ubushakashatsi bwa RBC yo muri 2018 igamije kwerekana ko ikibazo gihari kandi gikomeye. Hatagize igikorwa abantu bashira bazize kubura uburyo bwo gufashwa gukira ibikomere kuko impamvu ya mbere y’uburwayi bwo mu mutwe ni ukubura amahoro no kudatuza k’umutima kubera icyaguhungabanyije. Ni ngombwa ko tumenya ibikomere byaduhungabanyije n’uburyo bwo gufasha abatugana kuko ari cyo Imana iduhamagarira.”

Biteganyijwe ko Abapadiri n’Abiyeguriye Imana bagera ku 120 bo muri Diyosezi ya Ruhengeri, Nyundo/ zone kibuye na Kibungo ari bo bazahabwa amahugurwa mu mushinga wo kongerera ubushobozi abapadiri n’abiyeguriye Imana mu bijyanye no gutega amatwi ,isanamitima no komora ibikomere.