Mexique: Padiri Juan Angulo Fonseca yishwe n’abantu bataramenyekana
Kiliziya Gatolika muri Mexique yatangaje ko ibabajwe n’ubwicanyi bukomeje kwibasira abakristu n’abihayimana; Ibi bikaba bitangajwe nyuma y’uko Padiri Juan Angulo Fonseca wakoreraga ubutumwa muri paruwasi ya Nuestra Señora i Guadelupe yishwe n’abitwaje intwaro bataramenyekana.
Urupfu rwa Padiri Juan Angulo Fonseca rwamenyekanye ku wa gatanu tariki 10 Gashyantare 2023, iperereza ryakozwe n’ikigo Centro Catolico Multimedia cyo muri iki gihugu rikaba rigaragaza ko abakoze aya mahano ari abantu bari babigambiriye.
Ikinyamakuru Aleteia.org dukesha iyi nkuru gitangaza ko Mexique ari kimwe mu bihugu byo ku isi aho abakristu gatolika bahohoterwa n’abagizi ba nabi, aba bagizi ba nabi bakaba bibasira cyane abapadiri. Abagera kuri 30 muri iyi myaka 10 bakaba bamaze kuvutswa ubuzima. Ni nyuma kandi y’uko muri Nyakanga 2022 umuntu utarabashije kumenyekana yateye urugo rw’abapadiri b’abayezuwiti, akica abapadiri babiri.
Musenyeri Rogelio Cabrera López, Arkiyepiskopi wa Monterrey akaba na Perezida w’Inama y’Abepiskopi muri Mexique(CEM) yatangarije Aleteia ko ubugome nk’ubu bw’indengakamere bukomeje gufata indi ntera, bukorwa n’abarwanya Kiliziya.
Padiri Juan Angulo Fonseca w’imyaka 53 yavutse ku wa 24 Mutarama 1970, ahabwa Ubusaseridoti mu 1998.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
