Mongolia: Abakuru b’Amadini n’Amatorero bashimiye Papa Fransisiko wabibukije isano n’icyerekezo bahuriyeho mu guteza imbere muntu

Mu butumwa yagejeje ku bakuru b’amadini n’amatorero bari bateraniye mu ngoro yitwa“Hun Theater” iherereye mu mujyi wa Ulaanbaatar mu gitondo cyo ku wa 3 Nzeri 2023; Papa Fransisiko yabibukije ko ubwumvikane aribwo sano ikomeye ikwiye kuranga abayoboke b’amadini anyuranye, bakabana badashamiranye cyangwa ngo babangamirane; ahubwo bagaharanira kubana kivandimwe nk’abasangiye urugendo rw’ubuzima.

Papa Fransisiko yagize ati “ Ukwihugiraho no guheranwa n’amahame runaka bisenya ubuvandimwe, bigakurura umwuka mubi n’ubushamirane; naho ubwumvikane bukazana ineza, ubwuzuzanye n’ubwiyoroshye hagati y’abadahuje imyemerere.” Papa Fransisiko yavuze kandi ko kugirana ibiganiro hagati y’abantu ari imwe mu nzira ibafasha kumenyana, kumvikana no gusobanukirwa ku byo badahuje; ibi bikababera uburyo bushya bwo kuzuzanya no gutera imbere aho kubatanya, dore ko abemera Imana benshi baba basangiye inkomoko n’icyerekezo kimwe.

Gabju Demberel Choijamts, umukuru w idini ry’Ababudiste mu mujyi Ulaanbaatar yabwiye abitabiriye iyi nama ko n’ubwo ku isi habaho amadini n’amatorero bitandukanye, bigendera ku mahame atandukanye, ndetse bikanabona isi mu buryo butandukanye; byose usanga bigamije gufasha muntu kugira imibereho myiza; kandi bigaharanira kumwigisha kugira neza, kwitwara neza, kuba umunyampuhwe, kumenya kubabarira, no korohera mugenzi we. Akavuga ko izi nyigisho zitakagombye guhagararira hagati y’abahuje idini gusa, ahubwo zagakwiye kubahirizwa no kubo badahuje imyemerere.

Yair Jacob Porat ukuriye idini ry’Abayahudi muri iki gihugu, yagarutse ku bwumvikane n’urukundo bikwiye kuranga abanyamadini bo muri iki gihugu nk’inzira nziza yafasha abagituye kubana neza; anongeraho ko muri iri dini bo batangiye uru rugendo; dore ko mu munsi mukuru wa Rosh Hashanah bizihiza buri mwaka tariki 15 Nzeri batumira abayoboke bo mu madini anyuranye bakaza, bagafatanya n’abayoboke b’iri dini kuwizihiza.

Ibiganiro byahuje Papa Fransisiko n’abakuru b’amadini n’amatorero bo mu gihugu cya Mongolia bbyitabiriwe n’abakuru b’amadini ya Budiste, Shamaniste, Isilamu, Itorero Evangelike, Abadivantiste, Hindu, Shinto, Bahayi, Latter-day n’abahagarariye idini ya Ortodoxe muri iki gihugu.