Mu Ruhango Padiri Eugène Niyonzima yamuritse Igitabo yise "ADDOLORATA" Kivuga ku rugendo rwo gukira ibikomere

Padiri Eugène NIYONZIMA asobanura ko igitabo yise Addolorata yacyanditse bishingiye ku byo yagiye ahura na byo mu guherekeza abantu bafite ibikomere. Aba ni bo bahagarariwe n'uyu "Addolorata" uvugwamo. Ati "Ni igitabo gikubiyemo inkuru y’umubyeyi nise Addolorata, wababaye cyane akagira ibikomere byinshi bigera kuri 5 birimo: Guhabwa akato, gutereranwa, gucishwa bugufi, kugambanirwa no gukorerwa akarengane gakomeye."

Muri iki gitabo, padiri Eugène asobanura inzira 4 zihindura impumuro y’ubuzima ari na zo uwaherekezaga Addolorata yifashishije kugira ngo abashe kumufasha gukira ibikomere bye. Iya mbere ni Inzira yo kumenya neza ibikomere bye uko bigaragara, uko bivurwa, uko byihisha n’uburyo umuntu yabisohokamo. Inzira ya kabiri ni inzira y’imbabazi. Inzira ya gatatu ni inzira y’inyabutatu yo guhinduka ari yo guhinduka mu bwenge, mu mutima no mu mutimanama. Inzira ya kane ni inzira y’isukurabwibukiro (La Purification de la Mémoire).

Mu gice cya mbere cy’iki gitabo, Padiri Eugene agaragaza inkuru mpamo y’uwahawe izina rya Addolorata wamusanze mu biro ababaye kandi arakaye cyane. Nyuma y'urugendo yagiranye na Padiri yasubije agatima impembero maze n'ubwo umutima we wari ugeze kure yongera kugaruka ibumuntu.

Padiri Eugène asobanura ko muri iki gitabo yashakaga kubwira abafite ibikomere by’ubuzima ko nta joro ridacya, cyane cyane abemeye kurambura amaboko bagahura n’impuhwe za Nyagasani.

Padiri Eugene agaragaza inzira 12 Addolorata yanyuzemo kugira ngo akire ibikomere. Muri izo nzira harimo gufata Icyemezo cyo kutihorera no guhagarika akarengane; Kwemera ikibi wagiriwe; Kugira umuntu wizera usangiza ibyakubayeho; Gusobanukirwa ubwoko bw'igikomere wagize; Kwakira no guha umurongo uburakari bwawe; Kwibabarira; Kugerageza kumva uwaguhemukiye; Guha igisobanuro kiza igikomere cyawe; Si byiza kubabarira ngo werekane ko ukomeye; Kwegera Imana no kurushaho; Kwiyunga hagati y'uwababaye n'uwababariwe.

Padiri Eugène yavuze ko iki gitabo cyatangarijwe mu Ruhango kuko ari ahantu hafite amateka akomeye mu guhuza abakomeretse na Yezu Nyirimpuhwe. Avuga ko kubera iyo mpamvu, Ruhango ari urugo rwihariye ba Addolorota baza kwituriramo ngo babone amahwemo.

Nk'uko padiri Eugene abigaragaza, Inyigisho ikubiye muri iki gitabo wayihinira mu magambo 10 ariyo: Ibikomere, ukuri, impuhwe, urukundo, imbabazi, ubutabare, ubwibukiro n’amizero.

Yagize ati"Aha mu Ruhango ni urugo karemano rwa Addolorata (C’est millieux naturelle). Kuko aha muri iyi ngoro ya Yezu Nyirimpuhwe mu Ruhango, ba Addolorata n’abameze nkawe niho baza kwiturira ngo babone amahwemo, ni ho baza kwibera, bakahamara igihe, icyumweru cyangwa ukwezi kugira ngo baganire n’impuhwe maze bumve ko ubuzima bwabo bwagarura impumuro. Ni ikimenyetso cyo kuvuga ngo ba Addolorata twese dukeneye guhura n’impuhwe kandi ibigo nk’ibi duhuriramo n’impuhwe nyampuhwe icyo byagenewe ni cyo. Twagombye kubigana kuko harimo abantu bafite uushobozi bwo kudufasha kugira ngo ubuzima bwacu buzahindure impumuro."

Padiri Eugène iki gitabo yagituye abantu bose baba mu buzima bugoye kandi bubabaje ariko bafite amizero ko Yezu azabakiza. Yagituye kandi n’abamufashije bose, abavandimwe n’inshuti banamufashije kugira ngo kibashe gusohoka, akagitura n’abazagisoma bose.

Kuri ubu iki gitabo ADDOLORATA kiraboneka mu Ngororo ya Yezu Nyirimpuhwe mu Ruhango , Mu ngoro ya Yezu Nyirimpuhwe i Kabuga, i Kibeho mu Ngoro ya Bikira Mariya Nyina wa Jambo n'i Gikondo. Ni igitabo cyamaze no gutunganywa ku buryo bw’amajwi icyo bita (Audio book) ku buryo ushobora no kucyumva mu buryo bw’amajwi aho cyamaze no gushyirwa ku mbuga nkoranyambaga.

Uyu muhango wo kumurika iki gitabo witabiriwe na Myr Smaragde Mbonyintege, Umwepisikopi wa Diyosezi ya Kabgayi uri mu kiruhuko cy’izabukuru, ari na we watanze ijambo ry’ibanze. Witabiriwe kandi n’abapadiri barimo Padiri Alexandre Uwizeye ushinzwe ishuri ry’ukwemera muri Diyosezi ya Kabgayi waje ari intumwa ya Myr Balthazar Ntivuguruzwa, Padiri Innocennt Muvunyi, uyobora Seminari nto ya Kabgayi, Padiri Jean Berchmas Gasasira uyobora Caritas na Komisiyo y'Ubutabera n'Amahoro muri Diyosezi ya Kabgayi, Padiri Fidele Mutabazi, Umuyobozi wa Kinyamateka n’abandi bapadiri, abihayimana n’abakristu bo muri Paruwasi ya Ruhango.