Nyuma y'umwaka ibikorwa byo gusengera mu Kibaya cy’amahoro mu Ruhango bihagaritswe, abakristu bategerezanyije amatsiko umunsi bazemererwa kuhasengera

Ikibaya cy’amahoro mu Ruhango hamenyekanye cyane kubera isengesho ryo gusabira abarwayi ryahaberaga buri ku cyumweru cya mbere cy’ukwezi ndetse na buri mwaka ku munsi mukuru w’impuhwe z’Imana wizihizwa ku cyumweru cya kabiri cya Pasika. Muri uyu mwaka wa 2026 ku nshuro ya mbere Umunsi mukuru w’impuhwe z’Imana wizihijwe ku buryo budasanzwe, ubera muri Kiliziya ya Paruwasi ya Ruhango. Nta mutambagiro wabaye nk’uko byari bisanzwe bimenyerewe.

Myr Balthazar Ntivuguruzwa umwepisikopi wa Diyosezi ya Kabgayi yavuze ko uyu mwaka umunsi mukuru w’impuhwe z’Imana mu Ruhango wizihijwe ku buryo budasanzwe kuko abakristu bari bamenyereye kuwizihiza ku buryo bukomeye bisanzuye bari mu kibaya cy’amahoro kuri ubu hakaba hafunze by’agateganyo kugira ngo babanze buzuze ibyo basabwe ngo bemererwe kuhasengera.

Myr Balthazar mu ijambo rye ku munsi mukuru w’impuhwe z’Imana tariki ya 12 Mata 2026 yavuze ko ibyo basabwe gukora byose kugira ngo bemererwe gusengera mu Kibaya cy’amahoro babikoze , bakaba bategereje ko inzego zibishinzwe ziza kureba ibyakozwe.

Ati”Nk’uko mwagiye mu bikurikirana hari ibyo twasabwe n’ubuyobozi kugira ngo dutunganye ikibaya cy’amahoro . Ibyo twasabwe gukora byose twarabyujuje, abashinzwe kuza kureba baraje kandi barabishimye baratubwira ngo nimwandike , nabyo twarabikoze . Twaranditse dusaba kugira ngo bongere kuduha uruhushya rwo gusengera mu Kibaya cy’amahoro ubu dutegereje igisubizo kizakurikira iyo baruwa twandikiye ubuyobozi bushinzwe kubikurikirana.’’

Myr Balthazar ashimira abakristu ba Paruwasi ya Ruhango, inshuti za Yezu Nyirimpuhwe,amatsinda atandukanye n’inshuti za Ruhango muri rusange abari mu Rwanda no hanze yarwo ubwitange bakomeza kugaragaza bitangira ingoro ya Yezu Nyirimpuhwe cyane cyane ubwitange bagaragaje kugira ngo bafashe ingoro kuzuza ibyasabwaga. Agira ati’’ Ibyasabwasabwaga byose kugira ngo ikibaya cy’amahoro gitunganywe bifite agaciro k’amafranga arenga miliyoni 400 z’amafranga y’u Rwanda. Ndabashimira uruhare rwanyu nk’abakristu kuko 2/3 by’aya mafranga yose yasabwaga yatanzwe n’abakristu mu buryo bw’ako kanya (Give Directe) bihura n’ibindi bikorwa by’ingoro bikorwa umunsi ku wundi.’’

Myr Balthazar aboneraho gushishikariza abakristu gukomeza gusenga bizeye no guhuza ubushobozi kugira ngo ingoro ya Yezu Nyirimpuhwe isohoze ubutumwa bwayo Imana yabahaye neza .

Bamwe mu bakora ingendo nyobokamana mu Ruhango bagaragaza ko bafite inyota yo kongera gusengera mu Kibaya cy’amahoro. Nkurunziza Patrick wo muri paruwasi ya Butare yavuze ko atareka kuza mu Ruhango ku munsi w’impuhwe z’Imana n’ubwo ikibaya cy’amahoro gifunze. Yagize ati ‘’Ntabwo nasiba kuza mu Ruhango k’umunsi ukomeye w’Impuhwe z’Imana. Ni ubwo bizwi ko Ikibaya gifunze , tutemerewe kuhasengera, naje mfite ikizere ko Nyagasani yanyakiriye kandi ari bumwe cadeau nk’uko bisanzwe bigenda ku munsi w’impuhwe z’Imana.

Dufitumukiza Donatha umuririmbyi wo muri Korali Regina Pacis ari nayo yaririmbye Misa yo ku munsi mukuru w’impuhwe z’Imana yavuze ko bafite amatsiko yo kuzabona umunsi ikibaya kizaba cyafunguwe. ati’’ Turishimye cyane kuko twataramiye mu Ruhango. Ni ubwo tutari turi mu Kibaya cy’amahoro ntabwo byatubujije kwakira impuhwe z’Imana , twakiriye Yezu mu mitima yacu. Dutegerezanyije amatsiko menshi umunsi bazatubwira ko ikibaya bagifunguye.twiteguye guhita tugaruka gusingiza Imana.‘’

Ni ubwo umunsi mukuru w’impuhwe z’Imana wizihijwe mu buryo budasanzwe, Myr Balthazar yavuze ko impuhwe z’Imana zidashobora gufungiranwa cyangwa se ngo zibuzwe kwinjira aho zagombaga kwinjira ngo ni uko hafunze.

Bimwe mu byasabwe n’ubuyobozi kugira ngo bemererwe kongera gusengera mu Kibaya cy’amahoro mu Ruhango , harimo gutunga aho imodoka ziparika, kongera umubare w’ubwiherero n’ubwogero, gushyiraho uburyo bwo gukurikirana ibiri kubera mu KIbaya kuri Televiziyo nini za rutura , n’ibindi. Ibi byose bikaba byarakozwe , imirimo ikaba yararangiye bategereje ko ababishinzwe baza gusura.