Paruwase ya cyeza ikomeje gushimangira umubano mwiza na Paruwase ya Aubange yo mu Bubiligi.

Padiri mukuru wa Paruwase ya Cyeza Aloys Munyansanga yavuze ko Paruwase ya Cyeza ifite ibyishimo byinshi byo kwakira urubyiruko rugera ku 10 rwaje ruherekejwe n’abandi 3 bashinzwe kwita ku rubyiruko aho rubarizwa muri Aubange barimo n'umunyarwakazi 1 ubarizwa mu Bubiligi ari nawe wafatanyije na Padiri mukuru wa Cyeza gutegura uru rugendo. Uru rubyiruko rukaba rwageze I Cyeza kuva tariki ya 25 Gashyantare 2025.

Yagize ati” Paruwase ya Cyeza ifitanye umubano na paruwase ya Aubange, niyo padiri mukuru wa mbere wa paruwase ya Cyeza padiri Michel Gigi avukamo. Akaba yarayoboye igihe kirekire iyi paruwase akaba umushumba utagira uko asa, kuko yemeye kwitangira intama yari ashinzwe kugera ku ndunduro y’ubuzima bwe. Mu gihe cya Jenoside yakorewe abatutsi mu gihugu cyacu bene wabo bashakaga kumutwara ngo ajye mu gihugu cye yabasubije agira ati”Ntabwo nshobora gusiga intama naragijwe, akora ibishoka byose aba umushumba utarumanza, mu mateka yaranze u Rwanda aba ikimenyetso kiranga ubumwe.

Padiri Miche Gigi, yatangiye ubutumwa bwe mu Rwanda mu ishuri rya st Andr I Kigali aza kuza I cyeza muri 1968, yitabye Imana muri 1994 mu gihe cya Jenoside yakorewe abatutsi.

Agaruka ku ruzinduko rw’uru rubyiruko Padiri Aloys yavuze ko ari kunshuro ya mbere iki gikorwa kibayeho ariko ko ikintu cyose kigira intangiriro. Urubyiruko rwavuye muri Abange , rushaka kumenya umuco wacu n’ uko tubaho. Babifashijwemo n’urubyiruko rwa hano I Cyeza batangiye kubikora kandi batwigiyeho byinshi

Padiri Aloys yagize ati”Icyaranze uruzinduko rw’urubyiruko rwa Aubange mu Rwanda by’umwihariko hano I Cyeza ni ubusabane, gukina, basuye imiryango 3 bikorwa mu matsinda, bagenda bikoreye Kinyarwanda inkangara.

Banagiye mu Rukari barushaho gucengera umuco wacu, nyuma baje kujya mu isoko bareba ibyiza mu isoko ry’i wacu baranahaha kandi ibyo bahashye byarabashimishije kuko babigize impano za benewabo. Banagize igihe cyo kujya ku rwibutso ku Gisozi, basobanukirwa amateka yaranze u Rwanda, bunamira abatutsi bazize Jenoside muri Mata 1994, gusura parike y’akagera n’ibindi.

Padiri mukuru wa paruwase ya Cyeza yasabye abakristu kubungabunga umurage Padiri Michel Gigi, wakunze Cyeza agakunda n’abanyarwanda yabasigiye . Ati “Hari ibikorwa byinshi byitiriwe Padiri Miche Gigi byagezweho kugira ngo atazibagirana hano i Cyeza no mu Rwanda. Twavuga nka poste de sante ya Cyeza ikora neza , inzu y'ababyeyi (maternite) ya Cyeza , amashuli yubatswe hirya no hino n'ibindi byinshi byakozwe binyuze mu cyitwa Donation Michel Gigi.

Adiri Aloys yavuze ko urwego rushinzwe intwari z’u Rwanda rwatangiye gukora ubushakashatsi kuri padiri Gigi kugira ngo azashyirwe mu rwego rw’intwar. Yavuze ko kubungabunga ibikorwa bye ari cyo gisabwa, kuko yakoze byinshi.

Padiri Aloys akaba avuga ko banashimira umupadiri wari inshuti ya Padiri Michel Gigi nawe watanze umusanzu ukomeye wo kubaka santarari ya Bilingaga uwo ni padiri Albert Resignaux, akaba yaratanze n’inkunga yo kuvugurura Kiliziya ya santarale ya Rutobwe ndetse no kuvugurura Kiliziya santarale ya Cyeza. Uyu mupadiri akaba yarakundaga kuza gusura Padiri Michel Gigi inshuro nyinshi mu Rwanda, ndetse kandi akaba akiriho ariko amaze gusaza cyane no kugira integer nkeya.

Yasabye urubyiruko kurangwa n’umutima ukunda bakagira Ubuntu, gukomera ku ndangagaciro z’abanyarwanda ku mpande z’abahungu n’abakobwa maze bakazaba abantu bazima. Abajijwe niba urubyiruko rwa Cyeza narwo ruzajya gusura urwo muri Aubange mu Bubiligi mu rwego rwo gushimangira ubucutikuko ifuni ibagara ubucuti ari akarenge,Yavuze ko ibintu bigira intangiriro buhoro kandi buhoro nirwo rugendo.yavuze ko bazareba icyafasha urubyiruko ku mpande zombi.

Alice Ingabire umunyarwanda umaze imyaka 20 abarizwa mu gihugu cya Luxembourg mu gace kegereye paruwase ya Aubange ari naho akorera ibikorwa bye bitandukanye. Niwe wafashije uru rubyiruko kuza mu Rwanda bitewe no kuba asanzwe afite ibikorwa akorera mu Rwanda byo gufasha abana kubona aho bigira heza binyuze muri gahunda yo gusana amashuri.

Alice afite association yubaka ikanasana amashuru yo mu gace ka Nyabikenke ahazwi nko ku Ndiza ari naho avuka. Avuga ko kuva kera yari afite inzozi zo kuzafasha abana bakiri mu mashuri kugira ngo bige neza, kuko kumenya ubwenge mu ishuri ari byo byamufashije akagera I Burayi. Afasha amashuri akeneye gusanwa, agafatanya na leta kugira ngo abashe gutanga umusanzu we mu kuzamura uburezi bwo mu Rwanda cyane cyane mu gace avukamo. Bimwe mu bigo by’amashuri byamaze guvugururwa bigizwemo uruhare na Alice harimo nka EP Ngoma, Ep Mugeyo, Ep Ndago na Ep Butare yose yo muri Nyabikenke.

Alice avuga ko bishimiye uko paruwase ya Cyeza yabakiriye, urubyiruko rwaje kubakira, bagasabana, bagatemberana n’ubwo mu minsi ya mbere habanje kubaho ikibazo cya communication kuko benshi mu rubyiruko rwa Cyeza batabashaga kuvuga igifaransa neza. Yasabye urubyiruko rw’u Rwanda gushyira imbaraga n’umuhate mu masomo, bakiga indimi nk’icyongereza n’igifaransa bagaharanira kuzimenya ku buryo burushijeho .

Madame Violaine Schmitz umuyobozi w’inzu y’urubyiruko muri Aubange yabwiye Kinyamateka ko hashize imyaka 2 bategura urugendo rwo kuza muri Africa by’umwihariko mu Rwanda kureba imibereho y’urubyiruko rwaho no gusabana narwo ndetse no kumenya umuco w’abanyarwanda.

Yagize ati” Twamenye Alice umwe mu banyarwanda baba mu Bubiligi kubera ibikorwa bye byo gufasha abana mu mashuri. Yadufashije kumenya byinshi no kubona cantact z’uko tuzagera hano mu Rwanda kandi twarazanye. Ni urugendo rwa kabiri rwo kureba umuco w’uko ibihugu bindi bibayeho dukoze, rukaba n’urugendo rwa kabiri dukoze nk’urubyiruko rubarizwa mu nzu y’urubyiruko muri Aubange ku mugabane w’Africa.”

Akomeza avuga ko bishimiye kugera I Cyeza no kubona ahantu umupadiri wo mu bubiligi yabaye akaba ari naho ashyinguye. Yagize ati” Padiri Michel Gigi arazwi cyane muri Aubange, nk’uko azwi hano mu Rwanda, hari n’ ibikorwa byamwitiriweriwe niyo mpamvu twishimiye kubona ahantu yabaye akaba anahafite ibikorwa birimo kwimakaza umuco w’ amahoro no gufashanya mu ba Kristu. Twabonye ibintu byinshi mu Rwanda byadushimishije, umuco wabo wose ni mwiza, twasuye urwibutso rwa Jenoside tumenya amateka yaranze u Rwanda mu 1994 tunabona bimwe mu bimenyetso biranga ayo mateka ,twari dusanzwe tuyasoma mu bitabo gusa. U Rwanda ni igihugu kiza, cyakira abantu neza, gifite n’abaturage beza ndetse n’ikirere cyaho kikaba cyaratuguye neza.

Mujawamariya Photide urubyiruko rwo muri paruwase ya Cyeza, yabwiye Kinyamateka ko bishimiye kwakira urubyiruko rwo mu Bubiligi rwaje kubasura bagasabana kandi bagatemberana nabo babereka ibyiza by’u Rwanda.

Ati” Twarishimye cyane kuba urubyiruko rwo muri paruwase ya Aubange mu Bubiligi rwaraje kudusura, twaratembereye, turasabana. Twabashije kubereka bimwe mu bigize umuco nyarwanda nko kubyina imbyino za gakondo, gukenyera, twaberetse n’ibikoresho by’umuco biri I Nyanza mu Rukari, twagiye kubereka uko bacuruza mu isoko ryo mu cyaro, barishima cyane kandi baranagura. Twaberetse uko baboha uduseke, imisambi n’ibindi bitandukanye. Twari dusanzwe tubona zimwe mu nkunga zitangwa na paruwase ya Aubange zo kuvugurura santarale no mu bindi bikorwa, ariko kuba urubyiruko rwaho rwaje kudusura byadushimishije cyane .Ikifuzo cyacu ni uko natwe paruwase ibidufashije twazajya mu Bubiligi tukabasura nk’uko natwe badusuye kuko byadufasha no kumenya aho padiri wabaye inaha I Cyeza Michel Gigi avuka.”

Padidi Michel Gigi wabaye imbarutso y’umubano mwiza wa Paruwase ya Cyeza na Paruwase ya Aubange yageze I Cyeza mu 1968, ni mu ntangiriro z’ishingwa ry’iyi paruwase kuko yashinzwe mu 1967. Yitabye Imana muri Jeonoside yakorewe abatutsi mu Rwanda 1994 yanze gusiga abakristu bari mu kaga. Muri Komini ya Aubange mu Bubiligi hari agace kitiriwe Padiri Michel Gigi,akaba ari umuntu uzwi cyane muri iki gihugu. Urubyiruko rwo muri paruwase ya Aubange rwasuye Cyeza, buri mwaka baba bafite gahunda yo kujya gusura uurubyiruko rwo mu bindi bihugu bakareba uko babayeho kandi bakamenya n’umuco wabo.