Ubudasa bwa Carol Askew w’imyaka 65 waciye agahigo ko kuba rutahizamu w’umugore ukuze kurusha abandi ku isi ukibasha kunyeganyeza incundura

Nk’uko ikinyamakuru worldguinnessrecord.com cyandika amakuru y’abaciye uduhigo ku ruhando mpuzamahanga kibitangaza,Carol Askew ni we mugore ufite imyaka myinshi ku isi kandi akaba agishoboye gukina umupira w’amaguru ku rwego rumwe n’abakibyiruka.

Carol Askew ubusanzwe akinira ikipe ya Gymea United FC ikina amarushanwa y’abategarugori bafite imyaka irenze 40, akaba amaze imyaka igera ku 10 ari we ukuze kurusha abandi bagore bitabira iri rushanwa, kandi agatsinda ibitego kakahava.

Carol Askew yatangiye gukina umupira w’amaguru kuva mu 1984 afite imyaka 37, akinira ikipe ya Sylvania Heights FC yo mu gihugu cya Australia avukamo, nyuma y’aho yakomereje mu yandi makipe arimo: Broken Hill, Mad Max, Fury Road, yongera kugaruka mu ikipe ya Sydney FC mu 2005, ubu akaba ayimazemo imyaka igera kuri 16.

Nyuma y’imyaka isaga 25 muri uyu mwuga, Carol Askew yahawe igihembo cy’umugore wahize abandi mu mupira w’amaguru muri iki gihugu; kuva mu 2022 akaba yarasinye amasezerano n’ikipe ya Gymea United FC yo muri iki gihugu, aho akina mu myaka yo hagati, imbere, inyuma ndetse rimwe na rimwe akanarinda izamu.

Carol Aslew avuga ko ibihe byiza yagiriye muri ruhago adateze kwibagirwa ari imikino inyuranye yagiye akina mu ikipe y’igihugu y’abagore ya Australia izwi ku izina rya “the Matildas” mu myaka itandukanye; naho umukinnyi yumva wamushimishije kurusha abandi akaba ari uwitwa Sam Kerr wabaye Kapiteni w’ikipe y’igihugu y’abagore ya Australia. Akavuga kandi ko kuba yanditswe mu gitabo cy’abaciye uduhigo ku isi(world guinness record) na we byamushimishije.