Umusaruro witezwe ku biganiro Abanyeshuri biga muri Kaminuza Gatolika zo muri Afurika bagiye kugirana na Papa Fransisiko
Abahagarariye umushinga “The Pan-African Catholic Theology and Pastoral Network”(PACTPAN)ugamije guhuza abanyeshuri biga muri za Kaminuza Gatolika ku mugabane wa Afurika buratangaza ko mu nama umushumba wa Kiliziya Gatolika ku isi Papa Fransisiko azagirana n’abanyeshuri biga muri izi kaminuza hitezwemo kumusaba ubuvugizi bugamije kubafasha guhangana n’imbogamizi z’iterambere urubyiruko rwo muri Afurika rugihura nazo .
Mu kiganiro Padiri Emmanuel Bueya, umuyobozi w’umushinga “The Pan-African Catholic Theology and Pastoral Network”yagiranye na ACI Africa kuri uyu wa gatatu, yatangaje ko uyu mushinga wateguye gahunda y’ibiganiro bizaba ku wa 1 Ugushyingo 2022; Papa Fransisiko akazaganira n’urubyiruko rwiga muri Kaminuza Gatolika zitandukanye yo ku mugabane wa Afurika. Ibi biganiro bizaba hifashishijwe ikoranabuhanga bikazitabirwa n’urubyiruko ruzateranira ku cyicaro cy’uyu muryango i Nairobi muri Kenya.
Padiri Emmanuel Bueya avuga ko iyi gahunda ari imwe muzo Papa Fransisiko akomeje gukorana n’abantu b’ingeri zitandukanye hirya no hino ku isi hagamijwe gukomeza gahunda ya Sinodi y’Abepiskopi iri gukorwa hirya no hino muri Kiliziya Gatolika ku isi, ukamubera umwanya wo kubatega amatwi no kuganira ku bibazo bitandukanye n’ibibera mu bihugu bitandukanye byo ku isi.
Abajijwe ku ngingo zizagarukwaho muri ibi biganiro, Padiri Emmanuel Bueya iyi gahunda itazaba umwanya w’urubyiruko wo kuganyira Papa Fransisiko, ahubwo uzaba igihe cyo kuganira na we no kumugisha inama, kumusaba ubuvugizi bujyanye n’imbogamizi urubyiruko ruri guhura nazo muri iyi minsi mu ntambwe rutera ziruganisha ku iterambere.
Avuga kandi ko urubyiruko ruteganya ku muganiriza kuri bimwe mu bibazo by’ingutu byugarije umugabane wa Afurika birimo ubukene, ibura ry’imirimo n’ibibazo bishingiye ku miyoborere mibi ikigaragara muri bimwe mu bihugu byo kuri uyu mugabane, intego y’iyi gahunda ikazaba atari iyo kumuganyira gusa ahubwo ari kumugisha inama, gusangira ibitekerezo no kumusaba guhora abazirikana mu isengesho kugira ngo imbogamizi urubyiruko rugihura nazo zikemuke.
Iyi gahunda yateguwe n’umushinga PACTPAN izahuza mu biganiro Papa Fransisiko n’urubyiruko rwiga muri Kaminuza Gatolika zo muri Afurika yok u wa 1 Ugushyingo 2022 izitabirwa n’urubyiruko ruzaturuka mu bihugu bitandatu byo muri Afurika, aribyo Ivory Coast, RD Congo, Kenya, Ouganda, Sudani y’Epfo na Zambia; izitabirwa kandi na bamwe mu Bepiskopi Gatolika bo kuri uyu mugabane bateganyijwe.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
