Ababikira b'abogezabutumwa b'urukundo birukanywe mu gihugu cya Nikaragwa muri Amerika y'Epfo
Nyuma yo kwirukana intumwa ya Papa muri iki gihugu n'ibindi bikorwa bitandukanye byo gutera ubwoba abepiskopi n'abapadiri, Leta ya Nikaragwa yirukanye ku butaka bw'iki gihugu ababikira b'Abogezabutumwa b'urukundo bazwi nk'Abakarikuta bashinzwe na Mama Tereza w'i Karikuta.
Nk'uko Myr Silvio José Baez, Umwepiskopi wungirije wa Managua yabitangarije ikinyamakuru Avenirre, Kiliziya muri iki gihugu yababajwe no kuba aba babikira birukanywe. Myr Baez avuga ko ari ukwambura abakene uburenganzira bwo kwitabwaho. Ashimira umurimo uyu muryango wakoreye igihugu kandi akabasabira umugisha aho bagiye gukomereza ubutumwa.
Abamisiyoneri b'urukundo bahagaritswe gukorera mu gihugu cya Nikaragwa nyuma y'aho Leta ifashe icyemezo cyo guhagarika imiryango itagengwa na Leta ikora ibikorwa by'ubutabazi igera ku 101, iyi Leta yemeza ko itubahiriza amategeko agena ibikorwa byo gufasha agenga iki gihugu. Kugera mu kwezi kwa kane Inteko ishingamategeko ya Nikaragwa yari yamaze guhagarika imiryango igera kuri 25.
Uyu muryango watangiye gukorera muri iki gihugu mu mwaka wa 1986, ubwo Mutagatifu Therese w'i Kalikuta yasuraga igihugu cya Nikaragwa. Icyo gihe Perezida wa Nikaragwa yari Daniel Ortega ari na we ukiyoboye igihugu muri iki gihe. Bakaba bari bafite ikigo cyita ku rubyiruko rwahejwe ahitwa Genade.
Leta ya Nikaragwa ivuga ko Aba babikira bagomba kuva mu gihugu kuko batubahirije itegeko ryo gukumira inkunga zihabwa abakora ibikorwa by'iterabwoba no kurwanya icuruzwa ry'intwaro ari na cyo cyatumye n'indi miryango myinshi itegamiye kuri Leta ihagarikwa. Avuga ku iyirukanwa ry'aba babikira Minisitiri w'Ubutegetsi bw'igihugu yavuze ko birukanywe kuko uyu muryango wakoraga ibikorwa utaherewe uburenganzira.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
