Abadominikani Misiyoneri b'Afurika mu byishimo by'impurirane

Ni ibirori byabereye kuri paruwasi Katedarali ya Byumba, bibimburirwa n'Igitambo cya Misa cyayobowe na Myr Papias Musengamana, Umwepiskopi wa Byumba wari kumwe na Myr Serviliyani Nzakamwitwa na Myr Kizito Bahujimihigo.

Muri ibi birori ababikira batanu aribo: Bernadette Nyiranteziyaremye wa Diyosezi ya Nyundo, Delphine Murekatete wa Kabgayi, Anuarite Umunezero wa Byumba, Claudine Muhorakeye wa Kabgayi, Nely Yakizi wa Bangui muri Centrafrique bakoze amasezerano ya mbere na ho Monique Uwizeye wa Kigali na Monique Mukamwezi wa Byumba, bakora amasezerano ya Burundu.

Aya masezerano yakiriwe n'umukuru w'Umuryango w'abadominikani Misiyoneri b'Afurika anemezwa n'umukuru w'Abadominikani mu Rwanda n'i Burundi ndetse n'umwepiskopi wa Byumba wanambitse impeta mu Izina rya Nyagasani Yezu abasezeranye burundu ndetse anaha umugisha abasezeranye bwa mbere.

Hamwe na Bagenzi babo, abasezeranye bambitswe umwambaro w'Abadominikani utari usanzwe wambarwa muri uyu muryango. Akaba ari umwambaro ugizwe n'Ikanzu, Umwitero wera ndetse n'ivara ryirabura. Uyu mwambaro akaba ari wo mwambaro mushya w'Abadominikani Misiyoneri b'Afurika nk'umuryango wemewe mu rugaga rw'imiryango y'Abadominikani ku isi.

Mu Ijambo rye, Umukuru w'Umuryango w'Abadominikani Misiyoneri, yashimiye abaje kubafasha gushimira Imana yateje uyu muryango intambwe ikomeye, by'umwihariko mu myaka itatu ishize.

Yagize ati"Turashimira Imana ibikorwa bikomeye yakoreye umuryango w'Abadominikani Misiyoneri b'Afurika by'umeihariko muri iyi myaka 3 ishize. Mu mwaka wa 2020 ni bwo umuryango wacu wemewe nk'umuryango w'Abihayimana wa Diyosezi, muri 2022 twahawe icyemezo ko twakiriwe mu muryango mugari w'Abadominikani. Muri uyu mwaka wa 2023 twihuje n'Umuryango w'Abamisiyoneri ba Namur."