Abakaridinali 200 bari mu nama y'iminsi ibiri ku mpinduka mu buyobozi bwa Kiliziya
Kuva kuri uyu wa mbere tariki 29 Kanama kugera tariki 30 Kanama 2022, Papa Fransisiko ayoboye Inama y'iminsi ibiri ihuje abakaridinali 200 mu rwego rwo kurebera hamwe amabwiriza mashya agenga Ubuyobozi bwa Kiliziya yatangajwe na Papa mu nyandiko "Praedicate Evangelium".
Iyi nama biteganyijwe ko izaba mu muhezo, yitabiriye n'abakaridinali 200 muri 226 Kiliziya ifite kugera ubu. Aba bakaba banarimo abaherutse kuwuhabwa kuri uyu wa Gatandatu.
Umunsi wa mbere w'iyi nama ukaba waranzwe n'ibiganiro ku bumwe bwa Kiliziya n'ubutumwa ihamagarirwa gukora imenyesha bose urukundo rw'Imana.
Atangiza iyi nama nk'uko bitangazwa na Vatican news, Papa Fransisiko yabanje gusaba abakaridinali kuyigiramo uruhare maze buri were agatanga igitekerezo cye. Nyuma hakurikiyeho ibiganiro mu matsinda hakurikijwe ururimi buri mukaridinali akoresha maze nyuma y'ibiganiro mu matsinda hakurikiraho gushyira hamwe ibyavuye mu matsinda.
Karidinali Marcello Semeraro na Karidinali Feroci, baganira na Vatican news, bauze ko uyu munsi wa mbere w'Inama waranzwe no gusabana ku bakaridinali bitabiriye iyi nama bagaragazaga ubwuzu bwinshi n'ubuvandimwe.
Urwandiko Praedicate Evangelium ku miyoborere ivuguruye ya Kiliziya rwasohotse tariki 16 Werurwe 2022, ubwo Papa yahimbazaga imyaka 9 amaze kuri uyu mwanya. Uru rwandiko rugaragaramo impinduka zagiye zikorwa mu bihe bitandukanye ndetse n'izindi nshya. Uru rwandiko rukaba rutanga icyerekezo gishya ku miyoborere ya Kiliziya, imiyoborere ishingiye ku kwitangira abandi, ku Ivanjili, gusaranganya imirimo, kandi itarimo kwiharira inshingano ndetse igashyira imbere ubunyamwuga
Ibitekerezo (0)
- Nta gitekerezo kirahaba. Ba uwa mbere utanga igitekerezo.
