Abanyeshuri bo muri Chicago bateguriye Papa Leo XIV impano yo kumwifuriza gukira vuba

Amakuru yatangajwe n’ibitangazamakuru byo muri ako gace kuri uyu wa Gatatu tariki ya 14 Ukwakira 2026, avuga ko abanyeshuri bo muri Our Lady of Mount Carmel Academy bateganya kumwoherereza amakarita amwifuriza gukira vuba ndetse n’igitambaro gishyushya gifite ibirango by’ikipe ya Chicago White Sox, akunda.

Abo banyeshuri bari mu itsinda ryitwa Team 14, rigizwe n’abanyeshuri bagera kuri 40, ryahawe izina rifitanye isano na Papa Leo XIV. Iri tsinda ryamenyekanye cyane ku mbuga nkoranyambaga nyuma yo gukora igikorwa cyo kwigana amatora ya Papa mushya (conclave) mu mwaka ushize. Bamwe muri bo baje no kujya i Roma, aho bagize amahirwe yo guhura na Papa Leo XIV.

Uretse ibyo, abanyeshuri bagize iri tsinda bakora ibikorwa byo gusenga no gufasha abandi buri kwezi, birimo gukusanya ibiribwa bigenerwa abantu batishoboye.

Umwe mu banyeshuri biga mu mwaka wa Gatandatu yagize ati “Numva ari byiza kwifuriza Papa gukira, kuko ameze nk’inshuti ya hafi. Narababaye cyane igihe numvaga ko arwaye.”

Undi munyeshuri wo mu mwaka wa Munani na we yavuze ko yari ahangayikishijwe n’ubuzima bwa Papa, agira ati “Nagize impungenge kuri Papa Leo kuko naramubonye, kandi afite inshingano zikomeye. Ndifuza ko yakomeza kugira ubuzima bwiza.”

Papa Leo XIV yabazwe ku wa Kabiri mu bitaro bya Gemelli, aho abaganga bamubaze bakamukuramo igice cyo hasi cy’igihaha cy’iburyo.

Mu itangazo ryashyizwe ahagaragara n’ibiro bishinzwe itangazamakuru bya Vatikani kuri uyu wa Gatatu, byavuze ko Papa yakorewe ibizamini bisanzwe by’amaraso. Ibyo bizamini byagaragaje ko gukira kwe nyuma yo kubagwa bikomeje kugenda neza nk’uko byari byitezwe.

Iki gikorwa cy’aba banyeshuri kigaragaza urukundo n’impuhwe bafitiye Papa Leo XIV, ndetse n’uruhare rw’urubyiruko mu bikorwa byo gusenga, gufashanya no guhumuriza abandi mu bihe bikomeye.