Abayobozi b'amadini atandukanye mu gihugu cya Kenya barahamagarira abanyakenya kuzakira neza umwanzuro w'urukiko rw'ikirenga

Tariki 15 Kanama 2022 ni bwo Komisiyo y'amatora mu gihugu cya Kenya yatangaje ko uwari Visi perezida w'iki gihugu, Dr. William Ruto, ari we watsinze amatora y'umukuru w'igihugu n'amajwi 50.49% atsinze Raila Amolo Odinga we wabonye amajwi 48.85%.

Tariki 22 Kanama 2022, Odinga yatangaje ko atemera ibyavuye mu matora anashyikiriza ikirego urukiko rw'ikirenga agaragaraza ko atemera intsinzi ya William Ruto yemeza ko amatora yabayemo uburiganya.

Mu itangazo ryo kuwa 29 Kanama 2022, abayobozi b'amadini atandukanye, harimo n'Inama y'abepiskopi Gatolika muri Kenya basabye abanyakenya kwitegura kwakira neza umwanzuro w'urukiko rw'ikirenga kuri iki kibazo, umwanzuro biteganyijwe ko uzatangwa tariki 5 Nzeri 2022.

Muri iri tangazo, abayobozi b'amadini bagira bati “turasaba twizeye ko icyemezo cy'urukiko rw'ikirenga kizagaragaza ukuri maze koko urukiko rw'ikirenga rukagaragaza ubutabera".

Muri iri tangazo, abayobozi b'amadini bongeye gusaba abanyakenya gukomeza kurangwa n'amahoro n'ituze nk'uko babigize igihe cy'amatora banasaba abakandida gukomeza kwimakaza ubumwe bw'abanyakenya bakirinda ibikorwa byageza ku makimbirane.

Abayobozi b'amadini muri iki gihe cy'amatora, bakomeje gutanga ubutumwa butandukanye bugamije kubuza abanyakenya kwishora mu bikorwa by'urugomo bitwaje amatora nk'uko byagiye bigaragara mu matora yo muri iki gihugu.