Abepiskopi batandukanye bazatanga ibiganiro muri Forumu ya 19 y'urubyiruko Gatolika igiye kubera i Kabgayi
Abepiskopi n'abayobozi bakuru mu nzego za Leta bazageza ibiganiro ku rubyiruko rusaga 1000 rutegerejwe muri Forumu ya 19 y'Urubyiruko Gatolika, iteranira i Kabgayi kuva kuri uyu wa 17 kugera kuwa 21 Kanama 2022.
Kuri gahunda iteganyijwe muri iyi Forumu, biteganyijwe ko Abepiskopi batanu ari bo: Nyiricyubahiro Antoni Karidinali Kambanda, Arikiyrpiskopi wa Kigali, Musenyeri Smaragde Mbonyintege, Umwepiskopi wa Kabgayi, Myr Seriviliyani Nzakamwita, Umwepiskopi wa Byumba uri mu kiruhuko cy'Izabukuru, Myr Celestin Hakizimana, Umwepiskopi wa Gikongoro na Myr Edouard Sinayobye, Umwepiskopi wa Cyangugu; bazageza ijambo cyangwa ikiganiro ku rubyiruko.
Mu Bepiskopi bazageza Ijambo ku rubyiruko harimo Myr Smaragde Mbonyintege, Umwepiskopi wa Kabgayi, biteganyijwe ko azageza Ijambo ku rubyiruko mu Gitambo cya Misa yo gufungura Forumu kuwa 18 Kanama 2022 no ku cyumweru tariki 21 Kanama 2022, mu Gitambo cya Misa yo gusoza Forumu. Harimo kandi Nyiricyubahiro Antoni Karidinali Kambanda, Arikiyepiskopi wa Kigali biteganyijwe ko azayobora Igitambo cya Misa yo gufungura Forumu akageza n'Ijambo ku rubyiruko. Undi Mwepiskopi biteganyijwe ko azageza Ijambo ku rubyiruko ni Myr Seriviliyani Nzakamwita, Umwepiskopi wa Byumba uri mu kiruhuko akaba na Perezida wa Komisiyo y'Abepiskopi ishinzwe Iyogezabutumwa ry'urubyiruko akaba nawe ari mu bazageza Ijambo ku rubyiruko mu gikorwa cyo gufungura Forumu.
Abandi Bepiskopi bateganyijwe kuzaganirira urubyiruko muri iyi Forumu harimo Myr Celestin Hakizimana, Umwepiskopi wa Gikongoro, uzatanga Ikiganiro ku ruhare rw'urubyiruko mu kubaka umuryango wishimye. Iki kiganiro kikaba giteganyijwe kuwa 18 Kanama 2022 guhera Saa Cyenda z'umugoroba. Ikindi kiganiro kizatangwa n'umwepiskopi ni ikizatangwa na Myr Edouard Sinayobye, Umwepiskopi wa Cyangugu, uzaganirira urubyiruko kuri Sinodi, mu ntero igira iti " Tugendere Hamwe mu bumwe, ubufatanye n'ubutumwa". Iki kiganiro kikaba giteganyijwe tariki 19 Kanama 2022, guhera saa munani z'umugoroba.
Uretse Abepiskopi, biteganyijwe ko urubyiruko ruzagira amahirwe yo kuganirirwa n'abayobozi bakuru mu nzego za Leta harimo abazaturuka muri Minisiteri y'Urubyiruko n'Umuco, Minisiteri y'Ubutegetsi bw'Igihugu na General James Kabarebe, umujyanama wa Perezida wa Repubulika mu by'umutekano.
Forumu ya 19 y'urubyiruko gatolika biteganyijwe ko izitabirwa n'urubyiruko rusaga 1000 ruturutse mu gihugu hose. Ibikorwa bitandukanye bikazabera mu ishuri rya College Sainte Marie Reine mu gihe Igitambo cya Misa yo gutangiza iyi Forumu kizabera muri Bazilika Nto ya Kabgayi.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
