Abepiskopi bo mu Rwanda bitabiriye inteko rusange ya ACEAC irimo kubera i Kinshasa

Myr Marcel Madila, Arikiyepiskopi wa Kananga muri Repubulika Iharanira Demukarasi ya Kongo akaba na Perezida w'iri huriro, ni we wafunguye ku mugaragaro iri huriro ribaye ku nshuro ya 14, mu gitambo cya Misa cyaturiwe muri Santere ya Caritas i Kinshasa kuri uyu wa 7 Nyakanga 2022.

Mu nyigisho yageje ku Bepiskopi yabibukije ko bahamagariwe gutanga amahoro no kuba abanyamahoro. Yagize ati "Icyo Yezu adusaba ni ukwamamaza amahoro. Tukaba abantu b'amahoro. Nk'uko nabibabwiye mu butumwa bwo kuwa 8 Nzeri 2020, twebwe Abepiskopi, dufite ubutumwe bwo kubaka amahoro, by'umwihariko muri aka karere k'ibiyaga bigari kazahajwe n'imidugararo n'intambara zidashira".

Agaruka ku mubano w'u Rwanda na Repubulika Iharanira Demokarasi ya Kongo, Myr Madila yagize ati "Uyu munsi imirindi y'intambara iratutumba ku mipaka y'u Rwanda na Kongo, nyamara dukwiye kumenya ko hari icyo dukwiriye gukora, Ijambo dukwiriye kuvuga, ubutumwa dukwiriye gutanga n'igikorwa gifatika dukwiriye gukora".

Myr Madila yibukije bagenzi be ko Kiliziya itigisha amahoro igihe yabiboneye umwanya ahubwo ko ari inshingano yahawe, ubutumwa bw'ibanze itegetswe gukora.

Yakomeje yibutsa ko amahoro y'ukuri ari amahoro y'umutima, amwe atangwa n'umutima mwiza, wiyoroshya, ubabarira, ukarengera abandi. Avuga ko uyu mutima utangwa no kwiyunga n'Imana no kwakira Roho Mutagatifu ari na ho ahera avuga ko igihe kigeze cyo kwegera Nyagasani ngo asakaze amahoro n'ubutabera mu bantu.