Ambasaderi w'u Budage mu Rwanda yakiriye Komisiyo y'Ubutabera n'Amahoro n'abashyitsi bayo bo mu Budage

Uru ruzinduko rwabaye mu rwego rwo kwakira umuyobozi mukuru wa AGIAMONDO, Serivisi ya Kiliziya Gatolika mu Budage, ishinzwe ubutabera n'Amahoro, uri mu Rwanda mu rwego rwo gusura Komisiyo y'Ubutabera n'Amahoro isanzwe ifitanye ubufatanye na AGIAMONDO.

Nyuma yo kugirana ibiganiro n'ubuyobozi bwa Komisiyo y'Ubutabera n'Amahoro, aherekejwe n'Umunyamabanga wa Komisiyo y'Ubutabera n'amahoro n'itsinda bari kumwe, bakiriwe na Ambasaderi w'u Budage mu Rwanda, bagirana ibiganiro byagarutse ku bufatanye hagati ya Ambasade y'u Budage na Komisiyo y'Abepiskopi y'Ubutabera n'Amahoro ndetse na AGIAMONDO.

Ambasaderi w'U Budage mu Rwanda yishimiye umurimo ukorwa na Komisiyo y'u Butabera n'Amahoro mu rwego rw'Ubumwe n'ubwiyunge by'umwihariko ibiteganywa gukorwa mu gihe cyo kwibuka ku nshuro ya 30, Jenoside yakorewe Abatutsi muri Mata 1994.

Padiri Niragire Valens, Umunyamabanga mukuru wa Komisiyo y'Ubutabera n'Amahoro yagejeje kuri Ambasaderi w'U Budage gahunda ya Komisiyo mu bufatanye n'izindi nzego yo kwitegura kwakira abagororwa barimo kurangiza ibihano, mu rwego rwo gutegura kominote kubakira no kubafasha gusubira mu buzima busanzwe.

Nk'uko yakomeje abisobanura, Komisiyo y'Ubutabera n'Amahoro yatangiye kwitegura ibikorwa byo guherekeza abagororwa barangije ibihano bagasubira mu buzima busanzwe, by'umwihariko abari bafungiye ibyaha bya Jenoside. Padiri Valens avuga ko hazakenerwa gutegura abajyanama hirya no hino bazafasha gukurikirana iki gikorwa ibintu avuga ko bizasaba ubushobozi ari na yo mpamvu batangiye guteguza abafatanyabikorwa ba Komisiyo kuzagira uruhare muri iki gikorwa.

Karidinali Kambanda yakiriye neza ubu busabe avuga ko inzego bireba zizabyiga zikareba uko byashyirwa mu bikorwa.

Ati “Birakwiye ko abagorowe bagira uburyo baherekezwa kugira ngo bwa bwitange n’imbaraga zakoreshejwe mu kugorora umuntu zitazajya ziba impfabusa.”

Mu rwego rwo gushyira mu bikorwa iki Cyifuzo no kwiategura, komisiyo y'ubutabera ku bufatanye na AGIAMONDO yahuje abahagarariye Komisiyo ku rwego rw'Igihugu no ku rwego rw'amadiyosezi ndetse na ba Omoniye b'Amagororero, mu rwego rwo kwigira hamwe uko iki gikorwa cyategurwa kuhira ngo kizagende neza.

Bwana Francis Zebaze,Umukozi wa Agiamondo ukorera muri Komisiyo y'Ubutabera n'Amahoro, yashimiye Ambasade y'U Budage uruhare yagize mu gikorwa cyo guhimbaza imyaka 25 y'urugendo rw'Ubwiyunge mu Rwanda, avuga ko Komisiyo yiteguye no gukorana n'iyi Ambasade mu zindi gahunda iteganya mu murongo wo gukomeza urugendo rw'ubwiyunge.