Arikidiyosezi ya Kigali igiye guhimbaza yubile y'imyaka 50 mu rwego rw'ikenurabushyo ry'umuryango

Yubile ya Arikidiyosezi ya Kigali mu rwego rw'ikenurabushyo ry'umuryango izabera muri paruwasi ya Nyamata ikazabanzirizwa na Forumu y'ingo izaba tariki 05-08/11/2026. 

Biteganyijwe ko Yubile y’umuryango izitabirwa n’abagera ku 1080 bo mu byiciro bitandukanye birimo: Abagabo n'abagore, abapfakazi, urubyiruko, abana n’abihayimana. 

Mu bizakorwa muri iryo huriro ry'ingo harimo inyigisho zitandukanye, ibiganiro mu matsinda anyuranye, ubuhamya, Misa n’ibindi.

Insanganyamatsiko ya Yubile y’imyaka 50 ya Arkidiyosezi ya KIGALI igira iti “URUGO RUBE IGICUMBI CY’IYOGEZABUTUMWA N’AMIZERO YA KILIZIYA”.

Muri iyi nama abayitabiriye barebeye hamwe ibyakozwe n'iyi komisiyo mu mwaka wa 2025-2026 birimo: Kwizihiza umunsi mukuru wa ba sogokuru na ba nyogokuru, guherekeza abapfakazi no gushyiraho amatsinda yabo muri buri paruwasi, guhugura abaherekeza ingo n’abafasha b’ingo, kwigisha abasore n’inkumi bitegura gushyingirwa, gutega amatwi, kunga no guherekeza imiryango, kwita ku ikenurabushyo ry’umuryango mu byiciro byose, guhugura abaherekeza abasore n’inkumi bitegura gushinga ingo za gikristu, guhugura abafasha b’ingo muri servise y’ubusugire bw’ingo, guhugura abazakora ubutumwa bwo gutega amatwi, kunga ingo no gutegura imiryango, kwizihiza iminsi mikuru itandukanye, irimo: icyumweru cy’imiryango, umunsi mukuru w’urugo rutagatifu rw’i Nazareti, umunsi mukuru w aba sogokuru na nyogokuru, Forum y’umuryango n’ibindi.

Uretse Forumu y'ingo na yubile mu rwego rw'umuryango, Komisiyo y'umuryango muri Arikidiyosezi ya Kigali izahimbaza umunsi wahariwe ubukangurambaga ku buryo bwa kamere bwo guteganya imbyaro, ukazaba tariki 07/11/2026, guhimbaza n'umunsi mukuru w’urugo rutagatifu rw’i Nazareti uzizihizwa tariki ya 27/12/2026.