Arkiyepiskopi Alick Banda wa Lusaka yarekuwe by’agateganyo nyuma yo kurara mu buroko

Arkiyepiskopi Alick Banda yatawe muri yombi ku wa Mbere, tariki ya 28 Nzeri 2026 n’Urwego rushinzwe kurwanya ibiyobyabwenge muri Zambia (Drug Enforcement Commission – DEC), aregwa kuba atunze umutungo ukekwaho kuba warabonetse mu buryo bunyuranyije n’amategeko, icyaha giteganywa n’ingingo ya 319 y’Igitabo cy’Amategeko Ahana cya Zambia. Urwego DEC ruvuga ko iyo modoka yaba yarakuwe mu mutungo w’Urwego rw’Imisoro n’Amahoro muri Zambia (ZRA) mu buryo bunyuranyije n’amategeko. Arkiyepiskopi Banda yitabye Urukiko rw’Abacamanza rwa Lusaka, ayobowe n’Umucamanza Mwandu Nakazwe, ahakana icyaha aregwa. Ku wa 28 Nzeri 2026, yasabwe ndetse atanga ingwate ya 80,000 ya Zambian [kwacha] kugira ngo afungurwe by’agateganyo, ariko ntiyahise arekurwa kuko ibisabwa kugira ngo ingwate ishyirwe mu bikorwa bitarangiriye igihe. Ni yo mpamvu yaraye mu buroko bwa Chimbokaila (Lusaka Central Correctional Facility) mu ijoro ryo ku wa 28 rishyira ku wa 29 Nzeri. Yarekuwe ku wa 29 Nzeri 2026, ahagana saa 16:20, amaze kuzuza ibisabwa by’ingwate, nkuko byemejwe n’igitangazamakuru cya Leta ya Zambia.

Arkiyepiskopi Banda yarekuwe nyuma yo kubahiriza ibisabwa birimo gutanga ingwate yagenwe n’urukiko ingana na 80.000 z’amakwacha ya Zambia (K80,000), ahwanye n’amadolari ya Amerika hafi 4.108. Nyuma y’uko atanze ingwate n’abishingizi batatu yasabwe n’Urukiko, rwanategetse Banda gutanga inyandiko ze z’inzira, bityo akaba atemerewe kuva mu gihugu mu gihe urubanza rugikomeje. Nyuma yo kurekurwa, Arkiyepiskopi Banda azakomeza gukurikiranwa n’urukiko mu gihe hategerejwe ibindi byiciro by’urubanza. Ibyo Arkiyepiskopi Banda aregwa ntibirahamya ko yabikoze, kuko urubanza rutararangira kandi akaba yarahakanye icyaha aregwa. Ubu ikibazo kiri mu nzira y’ubutabera kandi kizakomeza gukurikiranwa hakurikijwe amategeko.