Butare : Musenyeri Filipo Rukamba arashishikariza urubyiruko gukunda imiryango-remezo n’imiryango y’ Agisiyo Gatolika

Atangiza iyi nama, Padiri Innocent BIZIMANA, Omoniye w’urubyiruko muri Diyosezi ya Butare yahaye ikaze abitabiriye inama bose, maze akomeza ashimira abapadiri bafatanya ubutumwa muri za Paruwasi n’urubyiruko, k’ubutumwa bumaze gukorwa muri gahunda yo kurushaho kugendera hamwe. Yibukije ubutumwa bumaze gukorwa mu rubyiruko harimo : Urugendo Nyobokamana i Kibeho kwa Nyina wa Jambo na Mwurire ho muri Paruwasi ya Mbazi (Butare).

Padiri Innocent yashimye ibikorwa byakozwe mu ikenurabushyo ry’urubyiruko muri za Paruwasi, nk’imikino inyuranye, ibikorwa by’urukundo, gushyira imbaraga mu bikorwa byo kwiteza imbere n’indi myidagaduro yagagayemo n’udushya nk’aho muri Paruwasi ya Magi abajeni baherutse kwitoramo umukobwa uhiga abandi mu myifatire myiza n’indangagaciro za gikristu (icyo umuntu yakwita Miss Magi). Anashimira Imana kubwo kuba icyorezo cya COVID-19 cyari cyarahagaritswe ibikorwa by’amahuriro cyarangiye, uyubukaba ari umwanya wo kubisubukura.

Mu butumwa yageneye urubyiruko, Mgr Filipo RUKAMBA, Umushumba wa Diyosezi ya Butare yarusabye gukunda Imana no kurushaho kwigirira icyizere, kwirinda ibiyobyabwenge ndetse no gukunda umurimo. Yabibukije kandi gukunda Kiliziya, maze abasaba kudacika intege no gukunda isengesho. Mgr Filipo agaruka ku nsanganyamatsiko urubyiruko rurimo kugenderaho muri uyu mwaka igira iti : "Muri iyo minsi Mariya yarahagurutse agenda yihuta". (Luka 1,39), yabasabye guhaguruka bakagenda bihuta bagashyira abandi Yezu nk’uko na Bikira Mariya yashyiriye Elizabeti Yezu.

Yakomeje abasaba kuva hasi bakajya gufasha no kumva abandi kandi bigakoranwa umutima ukunda nta kangononwa. Mu gusoza ubutumwa bwe, Musenyeri yasabye abajeni kwirinda kujarajara mu madini anyuranye, ahubwo abakangurira kujya no gukunda imiryango-remezo n’imiryango ya Agisiyo Gatolika.

Iyi nama yasojwe no gutora Komite nshya y’urubyiruko ku rwego rwa Diyosezi ya Butare, ikaba yarahawe manda y’imyaka itatu.