Chorale Saint Vincent Pallotti yakoze Igitaramo gitegura Noheli

Iki gitaramo cyabereye mu nzu Mberabyombi ya paruwasi Gikondo, kitabiriwe n'Abapadiri batandukanye, Abihayimana mu miryango inyuranye, abaririmbye muri iyi Chorale Saint Vincent Pallotti, abakirisitu ba Paruwasi Gikondo inshuti za chorale n'abandi baturutse hirya no hino.

Umuyobozi wa Chorale Saint Vincent Pallotti Joseph Sibomana, Yashimiye abashinze iyi chorale barangajwe imbere na Padiri Janvier Gasore.

Agaruka ku mpamvu y'iki gitaramo yavuze ko bagiteguyr bagamije kwinjiza abakirisitu mu munsi mukuru wa Noheli no gushimira Imana yabarinze muri uyu mwaka wa 2024.

Mu kiganiro kihariye yagiranye na Kinyamateka Joseph yavuze ko ubutumwa bwa Chorale yabo bushingiye ahanini ku kuririmba mu Misa cyane ko ari nayo ntego yashingiwe ariko mu buryo bwo gukomeza kwiteza imbere no gukura mu miririmbire banasusurutsa abakirisitu, bategura ibitaramo nk'ibi kugira ngo babashe kwerekana impano bifitemo mu buhanzi, bigatuma abahanzi ku giti cyabo babarizwa muri iyi Chorale babona umwanya wo gutambutsa ibihangano byabo ndetse bakarushaho kumenyekana.

Umuyobozi w'Inama nkuru ya Paruwasi ya Gikondo Vincent Murenzi, yashimiye Chorale Saint Vincent Pallotti, yabasusurukije, avuga ko bari ku rwego rwiza kuko baririmba indirimbo zitandukanye kandi buri wese akaryoherwa.

Yasabye ko iki gikorwa cyaba ngaruka mwaka ndetse n'andi makorale akabireberaho. Yabifurije gukomeza guteza imbere iki gitaramo kikagera no ku rwego rw'ibindi bitaramo bikomeye.

Padiri mukuru wa Paruwasi ya Gikondo, Padiri Jean Pierre Nsabimana, mu ijambo rye, yashimiye Korali Saint Vincent Pallotti ibinjije mu byishimo bya Noheli.

Ati"Mu gihe twitegura umukiza, Yezu kristu ashaka kuvukira mu mitima yacu ahari agahinda akahashyira ibyishimo, aba bavandimwe turabashimira cyane kuba badufashije gutegura imitima yacu."

Padiri mukuru kandi yashimiye abakristu kuba bitabiriye Igitaramo ari benshi " Ati"Mbashimiye mwe mwigomwe mukaza kudushyigikira kuko biba bibabaje gutegura ibirori ukabura ababyitabira."

Padiri Janvier Gasore washinze Chorale Saint Vincent Pallotti aganira na Kinyamateka yavuze ko igitekerezo cyo gushinga iyi chorale cyaje nyuma ya Jenoside yakorewe Abatutsi bitewe n'uko icyo gihe muri Paruwasi Gikondo Chorale zasaga nk'aho zacitse n'izari zihari zitazi umuziki. afatanyije na mugenzi we wahoze ari Umubikira Rita Ndumukobwa bashinze iyi Chorale ihabwa izina rya Saint Vincet Pallotti kuko nabo bari Abapalotini.

Yakomeje avuga ko ubu yishimiye ko Chorale yashinze itigeze icika intege. Ati"Ubu ndumva narageze ku butumwa bwanjye nabonye bari ku rwego rwiza rushimishije, ndabashimira kuba bataracitse intege, narabigishaga ariko nyuma mpabwa ubutumwa ahandi, hari ubwo bari gucika intege ariko barazamutse."

Padiri mukuru ukuriye Abapadiri b'Abapalotini, Padiri Eugene Niyonzima wifatanyije na Chorale Saint Vincent Pallotti muri iki gitaramo, yatangaje ko yishimiye uburyo Paruwasi yabo ikomeje gutera imbere muri byose.

Chorale Saint Vincent Pallotti ikorera ubutumwa bwayo muri Paruwasi Gikondo ikaba ikoze igitaramo cya Noheri ku nshuro ya 3.

Yakomeje avuga ko iyi chorale yatumye imitima yabo irushaho kwaguka ayifuriza gukomeza kwaguka no kwagura impano bifitemo.

Ni Chorale yashinzwe mu 1997 ishinzwe na Padiri Janvier Gasore umupadiri wumupaloti ubu akorera ubutumwa mu Ruhango ku ngoro ya Yezu Nyiri mpuhwe.

Kugeza ubu iyi Chorale ifite abanyamuryango barenga ijana barimo abari mu butumwa bunyuranye hirya no hino mu Rwanda no mu mahanga gusa abakora kandi baboneka buri munsi ni 60.

Mu byo iyi Chorale yishimira ni uko ijya ivukamo n'Abapadiri.