Cyangugu- Komisiyo z'ubutabera n'amahoro ku maparuwasi zirasabwa kudategereza abaterankunga

Ibi Musenyeri Edouard yabitangarije abahagarariye Komisiyo y'ubutabera n'amahoro mu maparuwasi agize diyosezi ya Cyangugu mu mwiherero wabahuje kuva tariki 26 kugera tariki 28 Nyakanga 2022, mu kigo cy'Abayezuwiti i Cyangugu.

Mu gutangiza uyu mwiherero, Musenyeri Edouard yasabye Komisiyo z'ubutabera n'amahoro ku rwego rwa paruwasi guteza imbere imishinga iciriritse mu rwego rwo guhangana n'ikibazo cy'igabanuka ry'abaterankunga gikomeje kugaragara.

Padiri Ngoboka Theogene, Umuyobozi wa Komisiyo ya Diyosezi ya Cyangugu y'Ubutabera n'amahoro, avugana na Kinyamateka, yadutangarije ko mu rwego rwo kubakira ubushobozi komisiyo z'ubutabera n'amahoro ku rwego rwa Paruwasi, buri paruwasi yagenewe inkunga y'amafaranga ibihumbi 150 mu rwego rwo gutangiza imishinga iciriritse yajya yunganira mu kubona iby'ibanze bikenerwa ku nzego z'ubutumwa bw'amaparuwasi. Padiri Theogene, avuga ko amaparuwasi amwe nka paruwasi ya Muyange bateje imbere iyi nkunga ku buryo bibafasha kuba bakora ubutumwa badategereje umushinga wa diyosezi cyangwa abandi baterankunga. Akaba ari naho Myr Edouard Umwepiskopi wa Cyangugu ahera asaba n'andi maparuwasi guteza imbere iyi mishinga iciriritse kuko ari igisubizo kirambye ku kibazo cy'imishinga y'abaterankunga igenda igabanuka.

Uyu mwiherero ngarukamwaka ufasha abagize iyi komisiyo kurebera hamwe ibyakozwe mu mwaka w'ubutumwa ushize, bakanavugana kuri gahunda ngari z'ubutumwa bw'umwaka ukurikiye. Ni umwanya kandi ku bagize iyi komisiyo wo kumenyana, bagasengera hamwe, bagasabana kandi bakigiranaho mu rwego rwo guhuza intambwe nk'abantu basangiye ubutumwa bumwe bw'ubutabera n'amahoro muri diyosezi.

Mu bikorwa bigari abagize komisiyo y'Ubutabera n'amahoro bagaragaje muri uyu mwiherero harimo igikorwa cyo gufasha abafunguwe gusubira mu buzima busanzwe biyunga n'abo bahemukiye, bagakora n'urugendo rw'ubwiyunge bashyirwa mu matsinda y'ubumwe n'ubwiyunge, kurwanya ihohoterwa rikorerwa mu miryango cyane cyane rikorerwa abagore n'abana; guteza imbere abasigajwe inyuma n'amateka no gufasha abafite ubumuga bw'uruhu.

Nk'uko Padiri Ngoboka Theogene, akomeza abisobanura, kugira ngo ibi byose bikorwe komisiyo y'ubutabera n'amahoro ikorana n'inzego za paruwasi binyuze ku bahuzabikorwa ba paruwasi, n'izindi nzego zahuguwe ku rwego rwa paruwasi zifasha gushyira mu bikorwa gahunda zitandukanye za komisiyo. Avuga ko kugera ubu muri buri paruwasi habamo ibiro bya komisiyo y'ubutabera n'amahoro birimo iby'ibanze byose byafasha gukurikira ibikorwa bya komisiyo kandi bakabitangira raporo kuri diyosezi.